विनियोजन विधेयकका सिद्धान्त र प्राथमिकतामा बिहिबारदेखि छलफल सुरु हुदैँ
काठमाडौं । आगामी आर्थिक वर्ष २०८१-८२ को लागि विनियोजन विधेयकका सिद्धान्त र प्राथमिकताका सम्बन्धमा बिहिबारदेखि प्रतिनिधि सभामा छलफल सुरु हुने भएको छ । प्रतिनिधि सभाको बिहिबारका बिहान ११ बजेका लागि बोलाइएको बैठकको सम्भावित कार्यसूचीमा आगामी आर्थिक वर्ष २०८१-८२ को लागि विनियोजन विधेयकका सिद्धान्त र प्राथमिकताका सम्बन्धमा (करप्रस्ताव बाहेक) छलफल हुने संघीय संसदका महासचिव पद्मप्रसाद पाण्डेले जानकारी दिए ।
Advertisement 1
यसअघि प्रतिनिधि सभा बैठकमा तत्कालिन गठबन्धन सरकारका अर्थमन्त्री डा.प्रकाशशरण महतले आर्थिक वर्ष २०८१-८२ को लागि विनियोजन विधेयकका सिद्धान्त र प्राथमिकताका पेस गरेका थिए । सत्ता समीकरण बदलिएसँगै वर्तमान नवनियुक्त अर्थमन्त्री वर्षमान पुनले छलफलमा सांसदले उठाएका प्रश्नको जवाफ दिनेछन् ।
सभामुख देवराज घिमिरेले फागुन २१ गतेदेखि नै विनियोजन विधेयकका सिद्धान्त र प्राथमिकताका सम्बन्धमा छलफल हुने गरी दिन तोकिएको जानकारी गराएका थिए । तर, सत्ता गठबन्धन परिवर्तन भई मन्त्रिपरिषद् पुनर्गठन भएपछि छलफल बिहीबारदेखि सुरु हुन लागेको महासचिव पाण्डेले ताए ।
Advertisement 2
आजैको प्रतिनिधि सभा बैठकमा संघीय मामिला तथा सामान्य प्रशासनमन्त्री भानुभक्त जोशीले संघीय निजामती सेवा विधेयक, २०८० प्रस्तुत गर्ने कार्यसूची पनि रहेको छ ।
