त्रिवि अध्यागमनका प्रमुख र अधिकृतमाथि प्रहरीले दुर्व्यवहार गरेका छन् ।त्रिभुवन विमानस्थलस्थित अध्यागमन कार्यालयका प्रमुख गोगन बहादुर हमाल  र अधिकृत छायालाल मोक्तानमाथि माथि विमानस्थलकै प्रहरीले हातपात गरेका छन्।

Advertisement 1

घटना आजै मध्यान्हको हो । प्रहरी र अध्यागमनबीचको विवादले हातपात भएको बताइएको छ । अध्यागमन अधिकृत मोक्तानमाथि त्यहाँ खटिएका प्रहरी जवान रविरञ्जन गुप्ताले अश्लील शब्दहरू प्रयोग गरेको र असई सञ्जय तामाङ लगायतका अन्य कर्मचारीहरूले लछारपछार गरी निर्घात कुटपिट गरेको अध्यागमन कार्यालयले जनाएको छ ।
यो प्रकरण पछि कार्यालय प्रमुख गोगन बहादुर हमाल सिसिटिभी मोनिटरिङ कक्षमा ढोका थुनेर उनीमाथि समेत प्रहरीले कुटपिट गरेको अध्यागमन कार्यालयले जनाएको छ ।

दुबै पक्षलाई राखेर सिसिटिभी मोनिटरिङ कक्षमा छलफल हुँदै गर्दा मोक्तानमाथि प्रहरीले हातपात गरेको र प्रहरीको ज्यादतीविरुद्ध बोल्दा कार्यालय प्रमुख हमाल माथि पछाडिबाट लात्ती प्रहार गरिएको जनाइएको छ ।हमालको दायाँ हातमा चोट लागेपछि विमानस्थलको आगमन एरियामा रहेको प्राथमिक उपचार कक्षमा ड्रेसिङ गरिएको छ ।

Advertisement 2

लगतै अध्यागमन कार्यालय प्रमुख हमालले घटनाबारे गृह मन्त्रालयलाई जानकारी गराएका छन् । यसबारे विमानस्थल सुरक्षा कार्यालय प्रमुख डीआईजी अर्जुन चन्द समेतको उपस्थितिमा छलफल भइरहेको छ ।

भिजिट भिसाको विषय बाहिर आएपछि नेपाल प्रहरी र अध्यागमनका कर्मचारीबीच विवाद छ । विमानस्थलमा सशस्त्र प्रहरी खटाएपछि नेपाल प्रहरी झन् असन्तुष्ट बनेको कर्मचारीहरू बताउँछन् ।