छोरीलाई परीक्षामा एक नम्बरमा उर्तीण गराउन खोज्ने लोक सेवा आयोगको अधिकृतमाथि कारबाही भएको छ ।

Advertisement 1

२०७६ जेठ ११ मा सञ्चालन भएको नेपाल वायु सेवा निगमको सहायक चौथो तह(खरिदार स्तर)को परीक्षामा सहभागी छोरीलाई उत्तर लेखिदिएर उर्तीण गराउन खोज्ने सुरक्षा निकाय तथा सङ्गठित महाशाखाको नतिजा तयारी शाखाका अधिकृत मिमबहादुर शाहीलाई बिशेष अदालतले ६ महिना कैद सजाय सुनाएको छ। विशेषका सदस्यत्रय यमुना भट्टराई, शालिग्राम कोइराला र खुसीप्रसाद थारूको इजलासबाट मंगलबार यस्तो फैसला भएको हो।

अख्तियार दुरुपयोग अनुसन्धान आयोगले ८ वैशाख ०७८ मा शाहीलाई प्रतिवादी बनाउँदै मुद्दा चलाएको थियो। जसमाथि दुई वर्षपछि फैसला गर्दै विशेषले कसुर कायम गरेको हो। शाहीलाई ६ महिना कैदका साथै २० हजार रुपैयाँ जरिवाना तोकेको उपरजिस्ट्रार नारद भट्टराईले जानकारी दिए। आयोग स्रोतका अनुसार उनलाई पाँच वर्षसम्म बढुवा र ग्रेड वृद्धि रोक्का गर्न लागिएको छ । छोरीको उत्तर पुस्तिकालगायत सबै परीक्षा आयोगले यसअघि नै रद्द गरिसकिएको छ ।

Advertisement 2

अधिकृत शाहीले वस्तुगत परीक्षामा आउने ५० प्रश्नहरूको सबै उत्तर ‘सी’ मात्रै लेखेर बाहिरिन भनेका थिए । उत्तर पुस्तिका जाँच्ने क्रममा ‘सी’ लाई ‘ए’ ‘बी’ र ‘डी’ बनाएर सच्याउनका लागि उनले त्यसो गरेको खुल्न आएको छ । वस्तुगत परीक्षामा ५० वटै उत्तर मिलेको देखिएपछि आयोगले शङ्का लागेर छानबिन गर्दा पछि उत्तर सच्याएको प्रमाणित भएको थियो । विधि विज्ञान प्रयोगशालामा गरिएको परीक्षणका क्रममा पछि सच्याएको प्रमाणित भएसँगै उक्त घटना बाहिर आएको हो ।