देशभरका एक सय ४० स्थानीय तह निमित्तकै भरमा चलिरहेको छ । जसमध्ये उपसचिव प्रमुख प्रशासकीय अधिकृत रहने ४४ नगरपालिका र ९६ वटा गाउँपालिका निमित्तकै भरमा चलिरहेका हुन । संघीय मामिला तथा सामान्य प्रशसान मन्त्रालयले ती निकायमा प्रमुख प्रशासकीय अधिकृत खटाउन नसक्दा ती स्थानीय तह निमित्तकै भरमा चलाउनु परेको हो । प्रमुख प्रशासकीय अधिकृतको अभावमा कतिपय स्थानीय तहले आगामी आर्थिक वर्षको बजेटसमेत ल्याउन सकेका छैनन् ।

Advertisement 1

सामान्य प्रशासन मन्त्रालयका अनुसार ४२ स्थानीय तहले समयमै बजेट ल्याउन सकेनन् । १० असार भित्रमा ७ सय ११ स्थानीय तहले मात्र बजेट ल्याएका हुन् । २९ गाउँपालिका र १३ नगरपालिकाले बजेट ल्याउन सकेनन् । समयमा बजेट ल्याउन नसक्ने स्थानीय तहमध्ये सबैभन्दा बढी २३ वटा पालिका मधेश प्रदेशका छन् ।

संघीय मामिला तथा सामान्य प्रशासन मन्त्रालयका अनुसार ४४ नगरपालिका र ९६ वटा गाउँपालिकाले बजेट ल्याउँदा निमित्त प्रमुख प्रशासकीय अधिकृत नगर तथा गाउँसभाको सचिव बन्नु परेको थियो ।
यता संघीय मामिला तथा सामान्य प्रशासन मन्त्रालयले भने कर्मचारी परिचालन गर्न सकेको छैन । सामान्य प्रशासनले जिम्मेवारी दिन नसक्दा एक दर्जन उपसचिव,तीस शाखा अधिकृत र २८ जना खरिदार सुब्बाहरुलाई बरण्डा महाशाखामा थन्काइएका छन् ।

Advertisement 2

मोहन घिमिरे,नवराज ढकाल,मुकेश रेग्मी, किसान न्यौपाने,गीता आचार्य, राजेन्द्रप्रसाद कँडेललगायतका उपसचिवहरु कौसीमा थन्काइएका छन् ।

यस्तै शाखा अधिकृतहरू सुवास रिजाल, अभिलाषा महर्जन, प्रकाश दुलाल, प्रभा पोखरेल, रामबहादुर यादव, तीर्थराज निरौला, उदयराज भट्टराई, निरञ्जन पाख्रिन, शालिग्राम देवकोटा, वीरबहादुर बस्नेत, सिन्धुकुमारी पाण्डे जिम्मेवारी पाएका छैनन् ।

प्रशासनतर्फका उपसचिव र शाखा अधिकृतहरूलाई हाजिर हुन नदिने, अहेव, जेटिए, कृषि प्राविधिकलाई निमित्त राखेर खेलो फड्को चलाउने स्थानीय तहमाथि मन्त्रीको वक्रदृष्टि शुरु भएको छ ।

केन्द्र सरकारले खटाएका कर्मचारीलाई हाजिर गर्न नदिई फिर्ता पठाइदिएपछि १२ स्थानीय तहको खाता नै रोक्का गर्ने प्रक्रिया अगाडि बढेको सामान्य प्रशासनले जनाएको छ । खाता रोक्का हुनेमा मधेशका सबैभन्दा धेरै नगरपालिका छन् । त्यसमा रौतहटको गढीमाई, गौर, कटहरिया, बाराको सिम्रौनगढ, मोरङको रतुवामाई, धनुषाको क्षिरेश्वरनाथ, जनकनन्दिनी, उदयपुरको त्रियुगा, काभ्रेपलाञ्चोकको पनौती, बाजुराको बूढीगंगा नगरपालिका र हुम्लाको अदानचुली गाउँपालिका रहेका छन् । गढीमाईले नगेन्द्र यादवलाई, गौरले छैटौं तहका अधिकृत सुवासकुमार ठाकुरलाई, कटहरियाले आठौं तहका अधिकृत रामप्रकाश साहलाई निमित्तको जिम्मेवारी दिएको छ । पनौतीले शिक्षातर्फ दशौं तहका अधिकृत प्रणराज न्यौपाने, बूढीगंगाले छैटौं तहका नरेन्द्रनाथ, सुर्खेतको पञ्चपुरीले शिक्षातर्फ नवौं तहका अधिकृत गोकर्णनाथ योगीलाई निमित्तको रूपमा काममा खटाइरहेको छ ।

अमनलाल मोदी मन्त्री हुनुअघि ३०५ स्थानीय तह निमित्तको भरमा थिए । उपसचिव र अधिकृत तहमा बढुवा भएका कर्मचारीलाई सिधै स्थानीय तहको प्रमुख प्रशासकीय अधिकृतमा खटाए, अझै १४० निमित्तकै भरमा चलिरहेका छन् । सबैभन्दा बढी ९८ गाउँपालिका, ४४ नगरपालिका अधिकारविहीन भएका कारण २९ वटा जिसस निमित्तकै भरमा घस्रिरहेको छ । साउनभित्रै निमित्तको खेतीपाती निमिट्यान्न पार्ने मोदीले बताए ।