एक जना रिटायर्ड सचिव भन्छन्,यो मुलुक सुख (सुब्बा र खरिदार)ले चलाएका हुन ।
फ्रन्ट लाइनमा खटिएर काम गर्ने भएका कारण मात्र होइन,कार्यालय प्रमुखहरुका लागि घुस असुलिदिने क्रममा पनि कतिपय खरिदार र सुब्बाहरु बदनाम छन्,अख्तियार लाग्दा तिनै नासु र खरिदारहरुलाई लाग्ने,हाकिमहरु उम्कने गरेका उदाहरण प्रशस्त देखिन्छ ।
यिनै खरिदार र सुब्बामध्ये कतिपय दुर्गमको एउटै कार्यालयमा बर्षाैदेखि सेवा गर्न बाध्य छन् । कोही यस्ता खरिदार पनि छन्,जस्को मन्त्रालयका उच्च अधिकारीहरुसँग पहुँच भएकै कारण संघीय मामिला तथा सामान्य प्रशासन मन्त्रालयले सिधै अर्को मन्त्रालय अन्तर्गतको कार्यालय नै तोकेर सरुवा गरिदिन्छ ।

Advertisement 1

यस्ता पावरफुल खरिदार हुन,उदयबहादुर खत्री,कर्मचारी संकेत नम्बर २४६१०९ रहेका खत्रीलाई गत वैशाख ११ गते जिल्ला हुलाक कार्यालय ओखलढुंगाबाट सिधै संघीय मामिला तथा सामान्य प्रशासनको अक्तिरिक्त समूहमा तानेर अर्काे मन्त्रालय (भौतिक पूर्वाधार मन्त्रालय मातहतको )हुलाकी राजमार्ग निर्देशनालय चाकुपाटमा खटाइदिएको भेटिएपछि प्रशासकहरु नै चकित बन्न पुगेका छन् ।

Advertisement 2

संघीय मामिला तथा सामान्य प्रशासन मन्त्रालयले निमुखा र पावर नहुने कर्मचारीको सरुवा नै गर्दैन । गरि हाले पनि मन्त्रालय वा अन्तर्गत गर्दै आएको छ । त्यस पछि मात्र सम्बन्धित मन्त्रालयले विभाग वा अन्तर्गत भनेर सरुवा गर्छ र विभागले बल्ल कार्यालयमा सरुवा गर्छ । तर, पहुँचवाला र प्रभावमा पार्न सक्ने खरिदारलाई संघीय मामिला तथा सामान्य प्रशासन मन्त्रालयले अर्कै मन्त्रालयको समेत सिधै कार्यालय तोकेर यसरी सरुवा गरेको भेटिएको छ ।

यसरी एउटा कर्मचारीलाई अर्कै मन्त्रालयको सिधै कार्यालय समेत तोकेर सरुवा गरिएको बिषयमा संघीय मामिला तथा सामान्य प्रशासन मन्त्रालयका सचिव कृष्णहरि पुष्करलाई जिज्ञासा राख्न पटक पटक फोन सम्पर्क गर्दा उनी इकर्मचारी डटकमको सम्पर्कमा आउन चाहेनन् ।