कर्णाली प्रदेश लोकसेवा आयोगले परीक्षकलाई प्रभावित पार्न उत्तरपुस्तिकामा नीजि विवरण लेख्ने परीक्षार्थीलाई कारबाही गरेको छ । परीक्षकलाई प्रभावित पार्न उत्तरपुस्तिकाको भित्री पृष्ठमा आफ्नो नाम, रोल नम्बर र मोबाइल नम्बर उल्लेख गर्ने २१ जना परीक्षार्थीहरुको आयोगले परीक्षा रद्द गरिदिएको हो ।

Advertisement 1

साथै, उत्तरपुस्तिकामा मोबाइल नम्बर लेख्नेलाई दुई वर्ष तथा नाम र रोल नम्बर लेख्नेलाई एक वर्ष परीक्षा दिन अयोग्य ठहर्याएको आयोगले जनाएको छ ।

आयोगको विज्ञापन नम्बर नं ५०३९५०६÷०७८९७९ इन्जिनियरिङ सेवा, सिभिल समूह, एकीकृत उपसमूह, सहायकस्तर पाँचौं तह, सवइन्जिनियर पदको गत जेठ २१ गते सञ्चालित लिखित परीक्षामा सहभागी २१ जना परीक्षार्थीले यस्तो हर्कत गरेको भेटिएको थियो ।

Advertisement 2

आयोगका शाखा अधिकृत कमलप्रसाद उपाध्यायले हिजो जारी गरेको सूचनाअनुसार लोकसेवा आयोग ऐन, २०७५ को दफा ६४ (१) (ख) बमोजिम ती परीक्षार्थीलाई कारबाही गरिएको हो । मुगुका राजेन्द्र शाहीलाई आयोगले दुई वर्षका लागि परीक्षा दिन नमिल्ने गरी कारबाही गरेको छ ।

एक वर्षका लागि परीक्षा दिन नपाउनेमा ममता पौडेल क्षेत्री, प्रेम जैसवाल, प्रविण पुलामी मगर, सरोजकुमार महतो, रामबहादुर चौहान मल्ल, अरुणकुमार साह, सुरेश ताम्राकार, सुशील यादव, देवनारायण आचार्य, राजेशकुमार यादव रहेका छन् ।

त्यस्तै, प्रकाश बडुवाल, भुवनचन्द्र जोशी, राहुल कठरिया, प्रदीप भट्ट, विरेन्द्रबहादुर अधिकारी, डम्मरबहादुर धामी, हिरादेवी डांगी, लोकेन्द्र विष्ट, नरेन्द्र अवस्थी, शम्भुप्रसाद साहलाई पनि कारबाही गरिएको आयोगले जनाएको छ ।