सरकारी कार्यालयमा कर्मचारीले सेवाग्राहीसँग खुलेआम घुस माग्ने गरेको तर आफूहरुले कारबाही गर्न नसकेको अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले स्वीकार गरेका छन् । आइतबार राष्ट्रियसभाको राष्ट्रिय सरोकार समितिको बैठकमा उनले मालपोत र यातायात कार्यालयमा जाँदा कर्मचारीले घुसको मोलमोलाइ गरिरहेको भेटिने बताए ।

Advertisement 1

समिति बैठकमा सांसदहरुलाई सम्बोधन गर्दै उनले भने, ‘हजुरहरु यातायात कार्यालय जानुस्, मालपोत कार्यालय जानुस् । अथवा अन्य सरकारी निकाय जहाँ सरकारी सेवा उपलब्ध गराइराखेको छ त्यहाँ जानुस् खुलेआम रुपमा कर्मचारीले व्यक्तिसँग पैसा मागिराखेको हुन्छ । मोलमोलाइ गरिराखेको हुन्छ । तर पनि हामी केही गर्न सक्दैनौं ।’

सर्वोच्च अदालतले स्टिङ अपरेशन अवैधानिक भनेपछि अख्तियारले सरकारी निकायमा हुने खुलेआम घुसखोरी रोक्न नसकेको राईको जिकिरि छ । ‘म सँग पैसा मागेको छ, पैसा म लगेर दिन्छु, समात्नुहोस् भनेर दिनमा दुई तीन जना आउँछन्’ राई भन्छन्, ‘हारगुहार गरिराखेका हुन्छन् ।’

Advertisement 2

उनले जसलाई जे मन लाग्छ त्यही गरेको र कसैप्रति जबाफदेही हुनुपर्छ भन्ने नदेखिएको टिप्पणी गरे । ‘हामी सबैले सबैलाई जे गर्दा पनि हुन्छ भन्ने हिसाबमा छुट दियौँ । जहाँ पनि, जसले जे गर्दा पनि ठिक छ कारबाही नगर्ने । कर्मचारीले मनपरी कार्य गर्छ फेसबुकमा । सोसल मिडियामा आफ्नै हाकिमको विरुद्धमा मनपरी लेख्छ । त्यो कर्मचारीलाई कारबाही गर्ने हिम्मत हामीमा छैन, तर कानुनमा छ’, उनले भने ।

उनले तिनै तहको सरकारले बनाएका ऐन, नियम, कानुन र नीतिभित्र रहेर कर्मचारीले काम गरेमा भ्रष्टाचार नहुने जिकिर गरे । सरकारले सुशासन कायम गराउन नसकेको उनको भनाइ छ । उनले भने, ‘हेर्दा खेरी समाजलाई भ्रष्टाचार नियन्त्रण गर्ने अख्तियार मात्रै हो कि भनेजस्तो सोच विकास भएको छ । त्यो होइन । भ्रष्टाचारको नियन्त्रण भनेको सबभन्दा पहिला सरकारको हो । सरकारले सुशासन कायम गर्न प्रयास गर्नुपर्छ ।’