अख्तियारलाई समेत टेर्दैनन् सचिवहरु
नेपाल सरकारका सचिव र सहसचिवहरुले अख्तियारलाई समेत अटेरी गर्ने गरेका छन् । अख्तियारले दुई साता अघि विभिन्न मन्त्रालयका सचिव र विभागका हाकिमहरुलाई टंगालस्थित रातो घरमै बोलाएर सुशासन कायम गर्न, विकास निर्माणमा ध्यान दिन र सार्वजनिक खरिदलाई पारदर्शी बनाउन निर्देशन दिएको भए पनि उक्त निर्देशनलाई सचिव र सहसचिवहरुले अटेरी गरेका हुन ।
Advertisement 1
अख्तियारले ती उच्च पदस्थ कर्मचारीहरुलाई कुनैखाले भ्रष्टाचारमा सहभागी नहुन, मातहतलाई पनि सुशासनयुक्त राख्न, परिणाम निस्कने गरी काम गर्न, विकास निर्माण कार्यलाई प्रभावकारी रूपमा सञ्चालन गर्न र जनतालाई प्रभावकारी सेवा दिनसमेत निर्देशन दिएको भए पनि आफ्नो निर्देशन पालना नभएपछि अख्तियारले ती मन्त्रालय र मन्त्रालयका सचिवलाई पत्र लेखेर ध्यानाकृष्ट गर्ने तयारी गरेको छ । अख्तियारले मन्त्रालयका सचिव तथा विभागीय प्रमुखसँगको छलफल कार्यक्रमलाई पुनः आयोजना गरी मन्त्रालयले गरेको प्रगति विवरण माग गर्न लागेको छ ।
अख्तियारले सरकारलाई दिएका सुझावको कार्यान्वयन, विकास आयोजनालाई समयमै मितव्ययी ढंगले सम्पन्न गर्ने र विकास निर्माणका कार्यमा गुणस्तर कायम गर्ने, एकीकृत विकासको अवधारणालाई कार्यान्वयन गर्ने, विकास निर्माण तथा सार्वजनिक खरिदसम्बन्धी सवाल र विषयगत सवालमा छलफल गराएको थियो ।
Advertisement 2
यसैगरी सार्वजनिक सेवाप्रवाह र विकास निर्माण कार्यको विद्यमान अवस्था, कार्यसम्पादनका क्रममा आइपरेका समस्या, भ्रष्टाचार नियन्त्रण र सुशासन प्रवद्र्धनका लागि गरिएका प्रयास र आयोगबाट दिइएका सुझाव कार्यान्वयनको अवस्थाको विषयमा केन्द्रित रहेरसमेत सचिव तथा विभागीय प्रमुखसँग छलफल गरेको थियो । छलफलका सबै विषय अहिले सचिव, तथा विभागीय प्रमुखले बिर्सिएका छन् ।
