तल्ला तहका कर्मचारीहरु आन्दोलनमा उत्रिएको १५ दिन पुग्यो । उनीहरुले केही दिनदेखि सेवाग्राहीलाई मर्का नपर्ने गरी आन्दोलन गरिरहेका छन् । प्ले कार्ड लगाएरै कार्यालयमा काम गरिरहेका खरदार र नासु तहका कर्मचारीहरु आन्दोलनको नयाँ स्वरुप र खाका कोर्न थालेका छन् ।
अहिले राष्ट्रिय स्तरका ट्रेड युनियनहरु समेत एकताबद्ध भएर आन्दोलनमा उत्रिएका छन् । उनीहरुले लामो समयदेखि अलपत्र परेको संघीय निजामती सेवा ऐन र सो ऐनका कतिपय प्रावधान समेत खरदार तथा नासुमारा रहेका कारण त्यसलाई समेत सच्याउनु पर्ने एजेण्डा बोकेर आन्दोलित भएका छन् । नासु बचाउ अभियानका अभियन्ता समेत रहेका प्रकाश भट्टराईले आन्दोलनको नयाँ प्रारुप र खाका तयार गर्ने काम भइरहेको प्रतिक्रिया दिएका छन् ।

Advertisement 1

राजपत्रांकित तृतीय श्रेणीको पदपूर्तिमा खुला ५० प्रतिशत, बढुवा ३० प्रतिशत, १० प्रतिशत आन्तरिक प्रतिस्पर्धा र १० प्रतिशत र अन्तरतह प्रतिस्पर्धा कायम गर्नुपर्ने,तहगत प्रणाली लागू गर्नुपर्ने र योग्यता पुगेका राजपत्र अनंकित कर्मचारीले पनि सहसचिव र उपसचिव पदमा प्रतिस्पर्धा गर्न पाउने व्यवस्था गर्नुपर्ने लगायतका माग आन्दोलनरत कर्मचारीहरुले उठाउँदै आन्दोलनरत छन् कर्मचारीहरु ।

यस्तै एकीकृत सरकारी कर्मचारी संगठनका अध्यक्ष समेत रहेका मोहन घिमिरेले कर्मचारीहरुको आन्दोलन रहर नभई बाध्यता भएको प्रतिक्रिया दिएका छन् । उनले यथाशक्य छिटो संघीय निजामती सेवा ऐन ल्याउन र ऐनमा नासु तथा खरदारहरुका हकहितका बुँदा समावेश गर्न समेत सरकारसँग आग्रह गरेका छन् ।
आन्दोलन आगामी २ गतेसम्म यही ढंगले अगाडि बढ्ने र ३ गतेबाट आन्दोलनका नयाँ स्वरुप र खाका बन्ने उनले सुनाए । जतिसक्दो चाँडो निजामती सेवा ऐन जारी गर्न सरकारलाई दबाबस्वरूप यस प्रकारको आन्दोलन थालिएको बताउँदै उनले भाद्र १ गते सम्पूर्ण दलका सचेतकहरुलाई ज्ञापन पत्र बुझाउन लागिएको र २ गतेसम्म सेवाप्रवाहमा असर नपर्ने गरी आन्दोलन गर्ने योजना रहेको सुनाए ।

Advertisement 2

तीन गतेबाट भने सेवा प्रवाह नै ठप्प पारेर आन्दोलनमा जाने योजना बनाइरहेको संगठनका नेता घिमिरेले सरकारले त्यो दिनसम्ममा सरकारले निजामती सेवा ऐन जारी गर्नका लागि प्रक्रिया अगाडि बढाउने कुरामा आशावादी रहेको सुनाए ।