अजय गोर्खाली

Advertisement 1

चितवन/हामीले खाने कुराहरु भोक, शक्ति, स्वाद र सन्तुष्टिसँग मात्र जोडिएको छैन, हाम्रो स्वास्थ्यसँगै प्रत्यक्ष सम्बन्धित छ यो । स्वच्छ, गुणस्तरीय एवम् सन्तुलित खानपानले हामीलाई स्वस्थ र दीर्घायु बनाउँछ भने अस्वच्छ, असन्तुलित र प्रदूषित खानाले हामीलाई रोगी बनाउँदै मृत्युको मुखमा समेत पु¥याउन सक्छ । त्यसैले कुनै पनि खानेकुरा खाँदा त्यसको स्वच्छता र गुणस्तरीयताको ख्याल गर्न एकदम जरुरी छ ।
नेपाल सरकारले बजारमा बेचिने खाद्य पदार्थहरुको स्वच्छता कायम राख्न जिल्लाहरुमा संयन्त्र नै राखेर काम गर्दै आएको छ । नियमित रुपमा खाद्य स्वच्छता सम्बन्धी जनचेतनामूलक कार्यक्रमहरु सञ्चालन गर्नुका साथै खाद्य उद्योग, पसल तथा होटल/रेष्टूरेन्टहरुको अनुगमन र कारबाही समेत गर्दै आइरहेको छ । वार्षिक रुपमा त्रैमासिक योजना बनाएर खाद्य स्वच्छताका लागि विविध कार्यक्रम सञ्चालन गर्दै आएको खाद्य प्रविधि तथा गुण नियन्त्रण डिभिजन कार्यालय, भरतपुर चितवनले सप्ताहव्यापी कार्यक्रम आयोजना गरेर विश्व खाद्य स्वच्छता दिवस २०२२ मनाएको छ ।
जुन १ मा कार्यालय परिसर सरसफाइ, विश्व खाद्य स्वच्छता दिवस तथा गुणस्तर अभिवृद्धि सम्बन्धी पत्रकार भेटघाट, खाद्य स्वच्छता तथा गुणस्तर सम्बन्धी सूचना सन्देश, ब्यानर तयारी र प्रचारप्रसार कार्यक्रम गरिएको कार्यालय प्रमुख घननाथ अधिकारीले जानकारी दिए । जुन २ मा खैरहनी, राप्ती र रत्ननगर नगरपालिकामा खाद्य बजार, होटल/रेष्टूरेन्ट अनुगमन तथा निरीक्षण गरिएको, जुन ३ मा कालिका नगरपालिकामा खाद्य स्वच्छता दिवस तथा गुणस्तर अभिवृद्धि सम्बन्धी जनप्रतिनिधिहरुसँग अन्तरक्रिया र खाद्य बजार, होटल/रेष्टूरेन्ट अनुगमन तथा निरीक्षण गरिएको अधिकारीले जनाए ।

उनका अनुसार जुन ५ मा भरतपुर महानगरपालिकामा खाद्य बजार, होटल/रेष्टूरेन्ट अनुगमन तथा निरीक्षण र खाद्य स्वच्छता तथा गुणस्तर सम्बन्धी सूचना सन्देश प्रचार–प्रसार कार्यक्रम भयो । जुन ६ मा पनि भरतपुर महानगरपालिकामै सडक छेउछाउमा  खाद्य पदार्थ बिक्रेताहरुलाई अनुगमन र खाद्य स्वच्छता तथा गुणस्तर सम्बन्धी सूचना सन्देश प्रचार–प्रसार गरियो । भरतपुर महानगरपालिकामा जुन ६ मै तेल, पानी उद्योग अनुगमन, खाद्य बजार, होटल÷रेष्टुरेन्ट अनुगमन र खाद्य स्वच्छता तथा गुणस्तर सम्बन्धी सूचना सन्देश प्रचारप्रसार गरियो । जुन ७ मा खाद्य स्वच्छता तथा गुणस्तर सम्बन्धी सूचना सन्देश प्रचारप्रसार र पत्रकारसँग भेटघाट गर्दै समापन कार्यक्रम गरिएको हो ।
दिवसको अवसरमा आयोजित यो सप्ताहव्यापी कार्यक्रममा भरतपुरको रामनगर, जुगेडी र दासढुंगास्थित थकाली किचन एण्ड तन्दुरी खाजा घर, राइस प्यालेस थकाली भान्सा घर, एलिना होटल, सुशील होटल र अशोका रिसोर्ट प्रालिमा अनुगमन गरिएको कार्यालयका खाद्य निरीक्षक प्रदीप काफ्लेले जानकारी दिए । रनपा, खैरहनी र राप्तीका दि आस्था स्टोर्स (खैरहनी), पराजुली होलसेल मार्ट (पर्सा), मास्के ग्रोसरी मार्ट (भण्डारा), आमा मिनी मार्ट (खैरहनी), आर्जन लिक्वयर सप, टुइन्स ब्रदर्स मिनी सप (रनपा) र बोगटीज मार्ट (रनपा) मा अनुगमन गरिएको कार्यालयले बतायो । कालिका नगरपालिकामा बुद्ध किराना, गाउँघर डिपार्टमेन्टल स्टोर्स, पाल्पाली पाण्डे डेरी, गोरखकाली किराना, लामा दिपज्योति स्टोर्स, अन्जन स्वीट्स, विनोद किराना लगायतका ११ वटा होटल÷ रेष्टुरेन्ट र किराना पसलहरुको अनुगमन गरिएको खाद्य निरीक्षक काफ्लेले बताए ।
‘होटलहरुमा खट्केको विषय भनेको खानेकुरा राख्ने तरिका त्यति राम्रो भएन । सरसफाइमा सुधार भइरहेको पनि छ’, खाद्य निरीक्षक काफ्ले भन्छन्, ‘हाटबजारहरुमा पकाएर बेच्न राखिएका खानेकुराहरुमा अलि बढी निगरानी हुन आवश्यक देखिन्छ । तेल, कच्चा पदार्थ र रंगको प्रयोग अस्वस्थकर ढंगले भइरहेको छ ।’ अहिले स्थानीय निकायहरुले पनि खाद्य स्वच्छताका लागि बजार अनुगमन निर्देशिका बनाइसकेको अवस्थामा अब उनीहरुले आफ्नै ल्याब र खाद्य विशेषज्ञ राखेर काम गर्न सक्नुपर्ने खाद्य प्रविधि तथा गुण नियन्त्रण डिभिजन प्रमुख अधिकारी बताउँछन् ।