अघिल्लो महिना लोकसेवा आयोगले स्थगित गरेको सह सचिवको परीक्षा रद्ध गरेको छ । आयोगले विज्ञापन नं १७१६७ ०७६ ७७, विविध सेवा, राजपत्राङ्कित प्रथम श्रेणी, सूचना प्रविधि विज्ञ पदका लागि गत असार ३१ गते २ बजेका लागि पूर्वनिर्धारित अन्तर्वार्ता कार्यक्रम राखेको थियो तर आयुक्त र परीक्षार्थीबीचकै सेटिङको आंशकामा सो परीक्षा एकाएक अन्तिम चरणमा आएर स्थगित भएको थियो ।
आयोगले सह सचिवको परीक्षा स्थगित गरेको एक महिना दिनपछि परीक्षा रद्ध गरेको हो । आयोगको बैठकले विविध सेवा, राजपत्राङ्कित प्रथम श्रेणी, सूचना प्रविधि विज्ञ पदको विज्ञापनको लिखित परीक्षा नतिजा प्रकाशन सम्मका सम्पूर्ण प्रक्रिया रद्द गरेको हो । सो विज्ञापनमा दरखास्त स्वीकृत भएका उम्मेदवारहरू मात्र सम्मिलित हुने गरी पुनः लिखित परीक्षा सञ्चालन गर्न नयाँ परीक्षा कार्यक्रम पछि प्रकाशन गरिने आयोगले जनाएको छ ।