निजामती सेवाभित्र सबैभन्दा बढी विकृती र बिसंगति कतै छ भने त्यो हो सरुवामा ।
मन नपरेका कर्मचारीलाई फुटबलजस्तो बनाइँदै आएको र राजनीतिक आस्थाका आधारमा कर्मचारीहरुलाई सरुवा गर्ने परिपाटी झनभन्दा झन झांगिदै गएको स्थिती छ । यही अबस्थाका बीच गृहमन्त्री बालकृष्ण खाँणले कर्मचारीहरुलाई सरुवा हुने दिन आयो भन्दै गनेर नबस्न निर्देशन दिएका छन् ।

Advertisement 1

पछिल्ला दिनमा विभिन्न जिल्लाका प्रमुख जिल्ला अधिकारीहरुसँग भर्चुअल संवाद गर्दै आएका मन्त्री खाँणले जिल्लाका शान्ति सुरक्षाको अबस्थाबारे जानकारी लिन आयोजना गरेको भर्चुअल बैठकमा यस्तो निर्देशन दिएका हुन ।
मन्त्री खाँणले अब मेरो सरुवा हुने बेला आयो भन्दै दिन गनेर नबसी आफ्नो दायित्व पूरा गर्नेतर्फ लाग्न निर्देशन दिएका हुन् । मन्त्री खाँणले प्रभावकारी कार्यसम्पादन गर्ने र जिम्मेवारी राम्रोसँग निभाउने प्रमुख जिल्ला अधिकारीहरुलाई तोकिएभन्दा बढी समय प्रजिअ बनाएर राख्न सक्नेतर्फ ध्यानाकर्षण गराउँदै जुन दिनसम्म जिल्लामा रहिन्छ सो समयसम्म प्रभावकारी काम गर्न सुझाउँदै प्रभावकारी रुपमा कर्यासम्पादन गर्न प्रजिअहरुलाई निर्देशन दिएका हुन ।
मन्त्री खाँणले कोभिड–१९ को महामारीका बेलामा आफैँ सङ्क्रमित भएर पनि शान्ति सुरक्षा सबल बनाउनमा भूमिका खेलेकाप्रति धन्यवाद दिँदैँ प्रजिअहरुलाई आगामी दिनमा त्योभन्दा राम्रो काम हुने विश्वास व्यक्त गरे ।

कतिपय प्रशासन कार्यालयमा सेवा प्रवाह सुस्त भएको गुनासो आएको सन्दर्भ जोड्दै मन्त्री खाणले जनतालाई समयमै सहज रूपमा सेवा प्रवाह गर्ने वातावरण निर्माण गर्न पनि निर्देशन दिए ।

Advertisement 2

बैठकमा एक प्रदेशबाट एक प्रजिअले वस्तुस्थितिबारे जानकारी गराएका थिए । प्रदेश नं १ बाट मोरङका प्रजिअ काशीराज दाहाल, मधेस प्रदेशबाट पर्साका प्रजिअ उमेशकुमार ढकाल, बागमती प्रदेशबाट मकवानपुरका प्रजिअ भरतमणि पाण्डे, लुम्बिनी प्रदेशबाट रुपन्देहीका प्रजिअ ऋषिराम तिवारी गण्डकी प्रदेशबाट कास्कीका प्रजिअ जयराज आचार्य, कर्णाली प्रदेशबाट सुर्खेतका प्रजिअ खगेन्द्रप्रसाद रिजाल र सुदूरपश्चिम प्रदेशबाट कैलालीका प्रजिअ किरण थापाले प्रदेशको वस्तुस्थितिकाबारे धारणा राखेका थिए ।