जिल्ला प्रशासन कार्यालय,रसुवाको एक्सन पछि आजदेखि सार्वजनिक यातायातको भाडादर घटेको छ । यातायात व्यवसायीहरुले सरकारले तोकेभन्दा पनि बढी भाडा असुल गरेको बिषयमा तीन दिन अघि इकर्मचारी डटकमले यातायात व्यवसायीले मनलाग्दी भाडा असुलिरहेको बिषयमा समाचार प्रकाशन गरेको थियो ।
समाचार प्रकाशन लगतै रसुवाको प्रमुख जिल्ला अधिकारी नवराज जैसी र रसुवाका डिएसपी देवेन्द्र पाण्डेले यातायात व्यवसायीसँग छलफल गरेका थिए ।
सरकारले गत १ कार्तिकदेखि बाग्मती प्रदेशभित्र चल्ने सवारी साधनको भाडा २३ प्रतिशतले बृद्धि गरेको थियो तर यातायात व्यवसायले सरकारले तोकेकोभन्दा तीन गुणासम्म बढी भाडा असुल उपर गरिरहेका थिए ।
प्रशासनको एक्सन पछि यातायात व्यवसायीले धुञ्चेदेखि काठमाडौं चल्ने सर्वाजनिक सवारी साधनको भाडादर ८७ रुपैयाँले घटाएका छन् । यस अघि यातायात व्यवसायीले धुञ्चेदेखि काठमाण्डौसम्मको भाडा ८ सय १७ रुपैयाँ लिँदै आएका थिए । जिल्ला प्रशासन कार्यालय रसुवाले यातायात व्यवसायीसँग छलफल गरेपछि भाडा समायोजन भएको हो । काठमाण्डौंदेखि रसुवा सदरमुकाम धुन्चेसम्मको दुरी १ सय १७ किलोमिटर रहेको छ । पुरानो भाडा अनुसार २ सय ९७ रुपैया तोकिएको भए पनि यातायात व्यवसायीले सरकारले तोकेभन्दा दुई गुणा भन्दा बढी अर्थात ६६५ रुपैंयासम्म उठाइरहेका थिए । गत १ कार्तिकदेखि २३ प्रतिशत भाडा बृद्धि गरी ३ सय ६५ रुपैया कायम गरिए पनि अहिले उनीहरुले सरकारले तोकेभन्दा झण्डै तीन गुणा बढी भाडा असुल गरेका थिए तर, हाल ८७ रुपौयाले घटाएको जौसीले बताए । प्रशासनको एक्सन पछि अब रसुवाबाट काठमाण्डौ सात सय ३० रुपैयाँ भाडादर लाग्ने भएको छ ।
यस्तै जिल्लाभित्रै सञ्चालन भइरहेको सार्वजनिक सवारी साधनले पनि आजदेखि साविकको भाडादरमा १० देखि १५ प्रतिशत मात्र भाडा लिने भएका प्रमुख जिल्ला अधिकारी नवराज जैसीले बताए ।