‘लोकसेवाको परीक्षामा रोक नलगाऊ’: सर्वोच्च अदालत
सर्वोच्च अदालतका न्यायाधीशहरू सपना प्रधान मल्ल र टंकबहादुर मोक्तानको संयुक्त इजलासले मुलुकमा कोरोना भाइरसको संक्रमण बढ्दै गएको भए पनि लोकसेवा आयोगबाट सञ्चालन हुने कुनै पनि परीक्षामा रोक लगाउन नहुने स्पष्ट गरेको छ ।
Advertisement 1
हाल देशमा कोरोना भाइरसको संक्रमण दर बढ्दै गएको उल्लेख गर्दै केदारकुमार अधिकारीसमेतले लोकसेवा आयोगबाट लिइने सम्पूर्ण परीक्षा स्थगित गर्न आदेशको माग गर्दै सर्वोच्चमा रिट निवेदन दायर गरेका थिए ।
सर्वोच्चले कोरोना भाइरसको संक्रमण बढ्ने घट्ने अनिश्चितता भएको अवस्थामा आयोगबाट सञ्चालन हुने परीक्षा रोक्नको लागि अन्तरिम आदेश जारी गर्न नमिल्ने उल्लेख गरेको छ । आयोगबाट उपस्थित हुनुभएको सहसचिव लोकबहादुर अधिकारीले परीक्षाका लागि उपत्यकाबाहिरबाट आउने परीक्षार्थीलाई आवगमनमा अवरोध नहोस् भनेर आयोगले आवश्यक व्यवस्था मिलाइसकेको पनि इजलाससमक्ष बताउनुभएको थियो । रिट निवेदकहरूले कतिपय जिल्लामा लकडाउन कायम रहेकाले इच्छुक परीक्षार्थी काठमाडौं आउन नसक्ने उल्लेख गरेका थिए । यसका लागि सम्बन्धित निकायसँग आयोगले समन्वय गरेको पनि दाबी गरिएको थियो ।
