गोदावरी पर्यटन प्रवद्र्धन महोत्सवबाट सङ्कलित रकम बाढीपीडितलाई दिइने
ललितपुर। ललितपुरको गोदावरीमा पर्यटन प्रवद्र्धन तथा बाढीपहिरो प्रभावित परिवारको सहयोगार्थ यही असोज २३ र २४ गते दुईदिने महोत्सव हुँदैछ।
Advertisement 1
आयोजक संस्था ‘क्रमशः इन्टरटेन्मेन्ट’ का प्रमुख सन्दीप महर्जनका अनुसार गोदावरीको पर्यटकीय सम्भावनालाई उजागर गर्दै स्थानीय कला, संस्कृति, खानपान तथा उत्पादनको प्रवद्र्धन गर्ने उद्देश्यले महोत्सव आयोजना गर्न लागिएको हो।
महोत्सवमा राष्ट्रिय तथा स्थानीय कलाकारको साङ्गीतिक एवं सांस्कृतिक प्रस्तुति रहनेछ। गोदावरीमा उत्पादित कृषि उपज, स्थानीय हस्तकला, मौलिक खानाका परिकार तथा अन्य स्थानीय उत्पादनका विभिन्न स्टलहरूसमेत महोत्सवमा राखिने छन्।
Advertisement 2
महोत्सवबाट सङ्कलन हुने रकम भोटेकोशी बाढी प्रभावित परिवारका लागि अस्थायी आवास निर्माणमा खर्च गरिने आयोजकले जनाएको छ। कार्यक्रमलाई मनोरञ्जनसँगै सामाजिक सहयोगको अभियानका रूपमा अघि बढाउन लागिएको महर्जनको भनाइ छ।
गोदावरी नगरपालिका–३ का वडाध्यक्ष राज घिमिरेले महोत्सवले गोदावरीको पर्यटन तथा स्थानीय उत्पादनको प्रवद्र्धनमा टेवा पुग्ने बताए। उनले पर्यटन प्रवद्र्धनसँगै विपद् प्रभावित परिवारलाई सहयोग गर्ने सामाजिक अभियानका रूपमा महोत्सवलाई अगाडि बढाइनु सकारात्मक पक्ष भएको धारणा व्यक्त गरे।
