सडक निर्माणको काम लथालिंग पारेका भन्दै दैलेख क्षेत्र नम्बर २ बाट प्रतिनिधि सभा सदस्यमा निर्वाचित सांसद दिक्पाल शाहीको तस्वीर रुखमा टाँसिएको छ । उनको पोस्टर सार्वजनिक स्थलमा टाँसेर सुर्खेतबासीले ‘माननीय ठेकेदार दिक्पाल शाहीज्यू बाटो कहिले बन्छ ?’, भन्दै प्रश्न गरेका छन् ।

Advertisement 1

सांसद शाहीका छोराको नाममा रहेको निर्माण कम्पनीले मदन भण्डारी राजमार्गअन्तर्गत सुर्खेत बड्डीचौरदेखि खम्बागाडे खण्डको १२ किलोमिटर सडक कालोपत्रेको जिम्मा लिएको छ । तर, कालोपत्रे गर्ने भनेर ठेक्का लिएको लामो समय बित्दा पनि कामअघि नबढेपछि स्थानीयले सांसद शाहीको तस्वीर रुख रुखमा टाँस गरेका हुन् । पूर्वाधार विकास निर्देशनालय सुर्खेत र सांसद शाहीको निर्माण कम्पनी अनक जयदेवी जेभी बाँकेबीच ४२ करोड ४७ लाख ६१ हजार रुपैयाँ लागतमा ठेक्का सम्झौता भएको थियो ।

शाहीको तस्वीरसहितको पोष्टर यतिबेला सामाजिक सञ्जालहरुमा समेत भाइरल भएको छ । उक्त सडकखण्ड निर्माणका लागि पूर्वाधार विकास निर्देशनालय, सुर्खेत र निर्माण कम्पनीबीच २०७९ असार १५ गते सम्झौता भएको थियो । तर, अहिलेसम्म काम अघि बढाउने सुरसार नदेखिएको सुर्खेतबासीले जनाएका छन् । सडक कालोपत्रेमा ढिलासुस्ती गर्दा सर्वसाधारणले सास्ती खेप्नुपरेको छ ।

Advertisement 2