जुम्लाको तिला गाउँपालिकाका तत्कालीन प्रमुख प्रशासकीय अधिकृतसहित ६ जनाविरुद्ध भ्रष्टाचार मुद्दा दायर भएको छ। अख्तियार दुरुपयोग अनुसन्धान आयोगको टोलीले आइतबार ६ जनाविरुद्ध भ्रष्टाचार मुद्दा दायर गरेको हो।

Advertisement 1

गाउँपालिकाका तत्कालीन निमित्त प्रमुख प्रशासकीय अधिकृत हरिश्चन्द्र नेपाली सार्कीसहित ६ जना कम काम गरी प्राविधिकसँग मिलि कार्य सम्पादन मूल्याङ्‍कन पुरा भएको देखाई उपभोक्ता समिति र प्राविधिकहरु मिलि बिल भरपाई बनाई अनुगमन गर्न लगाई सरकारी रकमको चरम दुरुपयोग गरेको अख्तियारको ठहर छ ।

विज्ञप्ति निकाल्दै अख्तियारले तिला गाउँपालिकाका तत्कालीन निमित्त प्रमुख प्रशासकीय अधिकृत हरिश्चन्द्र नेपाली सार्की, इन्जिनियर जनक रोकाय, सवइन्जिनियर प्रेम बहादुर बस्नेत, नाग्मा पार्क तथा उद्यान निर्माण उपभोक्ता समितिका अध्यक्ष नन्द बहादुर बुढा, सचिव अर्जुन बुढा र कोषाध्यक्ष दिलधरा दमाईविरुद्ध अख्तियारले विशेष अदालतमा आरोपत्र दायर गरेको प्रवक्ता भोला दाहालले जानकारी दिए ।

Advertisement 2

जुम्ला तिला गाउँपालिका १ नाग्मा पार्क उद्यान निर्माणमा कम काम गरी प्राविधिकसँग मिलेर कार्य सम्पादन मूल्याङ्कन पूरा भएको देखाएर बिल भरपाई बनाउँदै सरकारी रकमको दुरुपयोग गरेको अख्तियारले जारी गरेको विज्ञप्तिमा उल्लेख छ ।

सार्की, रोकाय र बस्नेतले भ्रष्टाचार निवारण ऐन, २०५९ को दफा ८ को उपदफा (१) को खण्ड (ग) र (ङ) बमोजिमको कसुर गरेको हुँदा उनीहरुलाई ५ लाख ४५ हजार ४१९.२४ बिगो कायम गरी सोही ऐनको दफा ८ को उपदफा (१) बमोजिम कैद र बिगो बमोजिम जरिबाना गरी असुल उपर गर्न र भ्रष्टाचार निवारण ऐन, २०५९ को दफा १९ को उपदफा (२) बमोजिमको कैद र जरिवानासमेतको सजाय हुन मागदावी गरिएको छ।

साथै, उपभोक्ता समितिका अध्यक्ष नन्दबहादुर बुढा, सचिव अर्जुन बुढा र कोषाध्यक्ष दिलधराबाट पनि ५ लाख ४५ हजार ४१९.२४ रुपैयाँ बिगो कायम गरी सोही ऐनको दफा ८ को उपदफा (४) बमोजिम सजाय गरी बिगो समेत जफत गर्न मागदावी प्रवक्ता भोला दाहालले जानकारी दिएका छन् ।