नवलपरासी पश्चिमका प्रमुख जिल्ला अधिकारी विश्वप्रकाश अर्यालको पछिल्लो व्यवहारको चौतर्फी निन्दा र आलोचना शुरु भएको छ ।
हालैमात्र प्रमुख जिल्ला अधिकारी अर्यालले प्राज्ञ तथा सहप्रध्यापक प्रा डा घनश्याम न्यौपाने ‘परिश्रमी’लाई दुर्व्यहार गरेको प्रकरण बाहिरिएपछि प्रजिअ अर्याल चौतर्फी आलोचनामा परेका हुन ।

Advertisement 1

नेपालमा बहर गजलमा पहिलो विधावारिधि गरेका परिश्रमी जो बर्दघाट नगरपालिका प्रज्ञा प्रतिष्ठानका कुलपति समेत हुन । उनलाई सेवा लिन जाँदा प्रमुख जिल्ला अधिकारीले सेवक नभई शासकको जस्तो व्यवहार गरेको र सास्ती दिएको घटनाप्रति भाषा,साहित्य, कला र सँस्कृतिको क्षेत्रमा साधनारत सम्पूर्ण स्रष्टाहरु दुखित हुँदै खेद प्रकट गरेका छन् ।
कुलपति न्यौपाने राष्ट्रिय परिचयपत्र बनाउनका लागि कार्यालयमा पुगेका थिए । त्यहाँ बिहान ११ बजेसम्म सरकारी कर्मचारी कार्यकक्षमा नभेटिएपछि उनले त्यसबारे प्रश्न गरेको थिए । सोही प्रश्न गरेकै कारण सेवाग्राही परिश्रमीलाई दुर्व्यवहार गरि हकारिएको भन्दै सामाजिक सञ्जालमा चर्काे निन्दा शुरु भएको छ । यो घटनाप्रति लुम्बिनी वाङमय प्रतिष्ठान नेपाल, चारु साहित्य प्रतिष्ठान नेपाल,बर्दघाट साहित्य प्रतिष्ठान लगायतका साहित्यिक संघ संस्थाले निन्दा र भत्र्सना गरेका छन् ।

घनश्यामले सेवा लिन जाँदा भएको सास्तीका बारेमा सामाजिक सञ्जालमा लेखेकै कारण प्रमुख जिल्ला अधिकारी अर्यालले उल्टै सामाजिक सञ्जालमा त्यस्ता कुरा हाल्न नहुने बताउँदै त्यसबारे आफूलाई भन्नुपर्ने जानकारी गराएको भन्दै यो घटना आफ्नो जीवनकै तीतो अनुभव रहेको उल्लेख गरेका छन् । लेखेका छन्, ‘मैले लाखभन्दा बढी विद्यार्थीलाई पढाएँ जीवनमा । भाषा साहित्यका क्षेत्रमा आजसम्म सेवा योगदान गर्दैछु । मैले जहिल्यै, भ्रष्टाचार, कामचोर प्रवृत्तिकाविरुद्ध लेख्दै आएको छु, लेखि पनि रहनेछु । पञ्चायतकालमा अनेकौं अपमान सहनुपर्थ्यो प्रहरी प्रशासनबाट । लोकतन्त्रमा कर्मचारीतन्त्र यस्तो हुन्छ भन्ने मैले ठानेको थिइन । सत्य कुरा सार्वजनिक गर्नु के मैले गरेको अपराध थियो र ? आज जीवनमा सबैभन्दा नमिठो अनुभूति गरेको दिन भएको छ मेरो । यसले एउटा महत्वपूर्ण लेख जन्माउनेछ अवश्य पनि । मैले फेरि यही स्टाटसका कारण प्रमुख जिल्ला अधिकारीज्यूका सामु हाजिर हुनु पनि पर्ला । तर गलत कुरालाई ढाकछोप गर्न मेरो विवेकले मान्दैन, मेरो नैतिकताले जान्दैन ।’

Advertisement 2