नेपाल नागरिक उड्डयन प्राधिकरणमा कनिष्ठलाई निमित्त महानिर्देशकको जिम्मेवारी दिइएपछि सो नियुक्ति विवादित बनेको छ। बरिष्ठहरुलाई पाखा लगाएर कनिष्ठलाई निमित्त महानिर्देशकको जिम्मेवारी दिइएसँगै सो नियुक्ति विवादित बन्न पुगेको हो ।
यस अघि क्यानका महाप्रवन्धक थिए राजकुमार क्षेत्री । क्षेत्रीलाई सरकारले गत कार्तिक ८ गते महाप्रवन्धकमा नियुक्त गरेको थियो । उनी ५८ बर्षे उमेर हद लागेर अवकाशमा गए पुस अन्तिम साता । चार बर्षका लागि नियुक्ति पाएको तर ५८ बर्षे उमेर हद लागेर दुई महिनामै घर फर्किनुपर्ने स्थितीमा पुगेका क्षेत्री आफूले चार बर्ष काम गर्न पाउनुपर्ने भन्दै अदालत पुगेका छन् ।
प्राधिकरणको ऐनमा महानिर्देशकको समयावधि चार वर्षको हुने तर उमेर हदसम्बन्धी कुनै व्यवस्था ऐनमा नभएको देखिएपछि उनी सोही ऐनमा टेकेर सर्वोच्चको ढोका ढकढकाउन पुगेको क्षेत्री सुनाउँछन । ऐनमा उमेरसम्बन्धी कुनै पनि व्यवस्था उल्लेख नगरिएको,यस अघि यस खालको प्रयास कसैले नगरेको उल्लेख गर्दै क्षेत्रीले अदालतले आफ्नो पक्षमा फैसला गरे नयाँ नजिर कायम हुने जिकिर गरेका छन् ।

Advertisement 1

यता क्षेत्री उमेर हद लागेर बाहिरने स्थितीमा पुगेपछि प्राधिकरणका निमित्त महानिर्देशक बनाइएका छन् प्रेमनाथ ठाकुर । उनीभन्दा सिनियर पाँच् जनालाई पाखा लगाउँदै ठाकुरलाई निमित्त दिइसँगै विवाद भएको हो।
प्राधिकरणमा १२ औं तहका कर्मचारीहरुमध्ये भोलाप्रसाद गुरागाईं, प्रतापबाबु तिवारी, हंशराज पाण्डे, देवचन्दलाल कर्ण र गोविन्दप्रसाद दाहाल र प्रेमनाथ ठाकुर कार्यरत छन् । उनीभन्दा सिनियर पाँच जनालाई बाइपास गर्दै अहिले निमित्त बनाइएको छ ठाकुरलाई । गत बर्ष मंसिर महिनामै १२ औं तहमा उक्लिएका तिवारी र गुरागाईंलाई माइनस गर्दै ठाकुरलाई निमित्त हाकिम बनाइएसँगै त्यहाँ विवाद निस्किएको छ ।