सरकारले ६ जना सचिवको गुपचुप सरुवा गरेको छ भने दुई जना सचिवको दरबन्दी थप्ने सामान्य प्रशासनको प्रस्तावलाई स्वीकृत गरेको छ । अस्ति बुधबार बसेको मन्त्रिपरिषद्को बैठकले ६ जना सचिवको सरुवा गर्नुका साथैं दुईको दरबन्दी थप्ने निर्णय गरेको हो ।
सरुवा भएका सचिवहरुमा यामकुमारी खतिवडा,दिनेश घिमिरे,सुशील तिवारी, खगेन्द्र नेपाल,किरण शर्मा,हरिप्रसाद मैनाली,मधुसुदन बुर्लाकोटी लगायत रहेका छन् ।
लामो समय उद्योग मन्त्रालयको सचिव हुँदै महिला बालबालिका मन्त्रालयमा कार्यरत यामकुमारी खतिवडालाई प्रधानमन्त्री तथा मन्त्रिपरिषद्को कार्यालयमा लगिएको छ । उनी केही महिना पछि नै अवकाशमा जाँदैछिन् । खतिवडाको ठाउँमा प्रदेश २ का प्रमुख सचिव हरिप्रसाद मैनालीलाई तानिएको छ । प्रदेश २ सरकारको प्रमुख सचिवमा भर्खरै सचिव बढुवा भएका कृष्णवहादुर राउतलाई पठाइएको छ ।
यस्तै हालै खारेजीमा परेको राष्ट्रिय पुनर्निमाण प्राधिकारका सचिव सुशीलचन्द्र तिवारीको राष्ट्रिय सतर्कता केन्द्रमा पुगेका छन् भने सतर्कतामा कार्यरत सचिव दिनेश घिमिरेलाई उर्चा आयोजको सचिवको रुपमा खटाइएको छ ।
यस्तै रिक्त रहेको रक्षा मन्त्रालयको सचिवमा वागमती प्रदेश सरकारका प्रमुख सचिव किरणराज शर्मालाई ल्याइएको छ । सुदूरपश्चिम प्रदेशका प्रमुख सचिव मधुसुदन बुर्लाकोटीलाई प्रधानमन्त्री कार्यालयको अतिरिक्त समूहमा तानिएको छ ।
उता सरकारले प्रम कार्यालयमै दुई सचिवको दरबन्दी थपेर त्यहाँ खगेन्द्र प्रसाद नेपाल र रमेश प्रसाद सिंहलाई खटाइएको छ ।