आम नागरिकमाझ कानुन कार्यान्वयन गर्नुपर्ने प्रहरीका कर्मचारी आफैँले न्याय पाउन पाउन नसक्दा हैरान छन् । खाँदै नखाएको बिष लागेर बर्षाैसम्म निलम्बनमा परी अन्याय भुक्तमान बेहोरेका प्रहरी कर्मचारी न्यायलयबाट सफाइ पाएको ८ महिना व्यतित हुँदा समेत संगठनले उचित जिम्मेवारी दिन नसकेकोप्रति प्रहरी कर्मचारीहरुले चित्त दुखाएका छन् ।
संगठनका नेतृत्वको ज्यादतीका कारण अन्याय भुक्तमान गरेका प्रहरी कर्मचारीले क्षतिपूर्ति पाउनु त परको कुरा योग्यता अनुसारको जिम्मेवारी समेत नदिँदा महिनौंदेखि हेर्डक्वार्टरमा पुग्ने,हाजिर गर्ने र फर्कने दैनिकी बनेको छ,एसपी दिल्लीराज बिष्ट र डिएसपी अंगुर जिसीदेखि कुमोध ढुंगेलसम्मको ।
महेन्द्रनगरकी बालिका निर्मला पन्तको बलात्कारपछि हत्या भएपछि घटनाको अनुसन्धानमा खटिएका आठ प्रहरी लापरवाहीपूर्ण अनुसन्धान गरेको नाममा बर्खास्तदेखि निलम्बनसम्मको शिकार भए । तिनैमध्येका हुन विष्ट र जिसीहरु ।
कञ्चनपुर जिल्ला अदालतका न्यायधीश गोपालप्रसाद बास्तोलाको ७७ साउन २३ गतेको निर्देशनात्मक आदेश दिँदै,आफ्नो कर्तव्य पालानामा खटिएका र राष्ट्रको सेवामा रगत पसिना बगाएका जिम्मेवारी प्रहरी अधिकारी उपर निजहरुको मान प्रतिष्ठा र वृत्तिविकासमैं गम्भीर असर पर्ने देखिएको,वृत्ति विकासमा असर पुग्ने गरी तथ्यहीन आरोप लगाएर कारबाही गरेको भन्दै क्षतिपूर्ति दिनसमेत संगठनको नाममा निर्देशनात्मक आदेश दियो । तर पनि संगठनले उपल्ला तहका प्रहरीलाई भने काममा खटाएको छैन । अदालतबाट आदेश आएको ५ महिना पछि २० पुस ०७७ को मन्त्रिपरिषद् बैठकले सेवामा पुनर्बहाली त गर्यो तर अझैसम्म जिम्मेवारी पाएका छैनन् । सो प्रकरणमा मुछिएका जिल्ला प्रहरी कार्यालय कञ्चनपुरका तत्कालिन एसपी दिल्लीराज विष्ट, केन्द्रीय अनुसन्धान व्युरोबाट खटिएका डिएसपी अंगुर जिसी, ज्ञानबहादुर सेठी, इन्स्पेक्टर एकीन्द्रबहादुर खड्का, जगदिशप्रसाद भट्ट, सई हरसिंह धामी, रामसिंह धामी र जवान चाँदनी साउद । जसमध्ये एसपी विष्ट र इन्स्पेक्टर भट्ट बर्खास्तीमा परेका । डीएसपी सेठी, निरीक्षक खड्का, सईद्वय धामी अनिवार्य अवकाशमा गइसकेका छन् । अदालतको आदेश पछि एसपी विष्ट र जिसीहरु जागिरमा त फर्किए तर आठ महिना भयो नक्सालस्थित हेर्डक्वार्टर प्रशासन पुग्ने,हाजिर गरी फर्कने दैनिकी बनेको ।
विष्टको दरबन्दी लुम्बिनी प्रदेश प्रहरी कार्यालय दाङ र जिसीको सुदूरपश्चिम प्रदेश प्रहरी कार्यालय दिपायलमा खटाइएको छ । जहाँ उनीहरुभन्दा तल्लो व्याजी हाकिम छन्,तिनका अण्डरमा काम गर्न खटाइएपछि उनीहरु हेर्डक्वार्टरमा हाजिर गर्दै आएका छन । एसपी विष्टका ब्याचीहरूमध्ये विकास खनाल,भोला रावल र धु्रव रावतबाहेक सबै प्रमोसन भएर सकिसके । आफ्नै व्याचीहरु वरिष्ठ प्रहरी उपरीक्षक (एसएसपी)मा बढुवा भएर डीआईजीको प्रतिप्रर्धामा छन् । उनका पछिल्ला व्याचीहरु डिआइजीमा बढुवा भइसकेका छन् । अहिले तिनकै अण्डरमा काम गर्नु भन्दै प्रदेशमा खटाइए पछि उनीहरु तल गएका छैनन् ।
निर्मला पन्त प्रकरणमा झैं डीएसपी कुमोध ढुंगेल पनि निलम्बनमा परे,पछि सर्वाेच्चको २३ फागनु ०७७ को फैसलाले सफाई पाए । ५ महिनादेखि जिम्मेवारविहिन बनेको उनको दैनिकी बनेको छ,हेडक्वार्टर जाने,हाजिर गरेर फर्कने । एकातिर,पुनर्वहाली पश्चात उपयुक्त जिम्मेवारी पाएनन् नै । उनीहरुको वृत्ति विकासमा गम्भीर क्षति र मान प्रतिष्ठाको अघात पुग्यो । यद्यपि प्रहरी संगठन प्रमुखको ध्यान यता जान नसकेको, आफ्नै अधिकारीहरूलाई न्याय दिन पनि नसक्ने स्थितिमा संगठन निरिह देखिएकोप्रति ती प्रहरी अधिकारीहरुले चित्त दुखाएका छन् ।