पहिले परराष्ट्रको सहसचिव बनेर ठगे,अहिले उपराष्ट्रपति कार्यालयको शाखा अधिकृत
सरकारी कर्मचारी हुँ भन्दै ठगी धन्दा चलाउँदै आएका एक व्यक्ति प्रहरीको फन्दामा परेका छन् । निजामती कर्मचारीको पोशाक लगाएर उपराष्ट्रपति कार्यालयको शाखा अधिकृत हु्ँ भन्दै ठगी धन्दा चलाउँदै आएका कुशल भट्ट प्रहरीको फन्दामा परेका हुन् । निजामती कर्मचारीको पोशाक लगाएर उपराष्ट्रपति कार्यालय जस्तो गरिमामय संस्थाको नाम दुरुपयोग गरि ठगी गरेको भन्दै नेपाल प्रहरीको महानगरीय अपराध महाशाखाले किशोर भनिने कुशल भट्टलाई समातेको हो ।
Advertisement 1
यस अघि समेत यस्तै धन्दा चलाएर प्रहरीले पक्राउ गरी ३० हजार धरौटी र एक बर्ष कैद तिराएर छोडेका भट्टको पूरानो बानी अझैं नसुध्रिएको अनुसन्धानमा खटिएका प्रहरी अधिकारीहरुले बताएका छन् । यस अघि उनले केही व्यक्तिलाई सामाजिक सञ्जालमार्फत् चिनजान गरि साथी बनाउँदै आफू परराष्ट्र मन्त्रालयको सहसचिव समेत हुँ भनि विश्वासमा पारी ठगी गर्दै आएको तथ्य खुलेको थियो । सोह्री अभियोगमा ३० हजार धरौटी र १ बर्ष कैद सजाय भुक्तमान गरेर छुटेका उनले पूरानो धन्दा फेरि चलाएको भेटिएको र सो आधारमा उजुरीहरु बढ्न थालेपछि प्रहरीले २६ वर्षिय कुशललाई कलंकी स्युचाटारबाट पक्राउ गरिएको हो ।
नपाएको ओहोदा वा पद पाएको भन्दै भ्रम सिर्जना गरी विभिन्न व्यक्तिहरुलाई अनेक बहानामा झुक्याएर व्यक्तिगत लाभ लिने उद्देश्यले ठगी गरेको भन्ने सुराकीको आधारमा महाशाखाबाट खटिएको विशेष टोलीले हिजो पक्रेको हो ।
Advertisement 2
डोटीको केआईसिंह गाउँपालिका वडा नं ६ स्थायी घर भई हाल कीर्तिपुर नगरपालिका वडा न ७ काठमाडौं बस्ने भट्टबाट पीडित सबैलाई महाशाखाले सम्पर्क राख्न अनुरोध गरेको छ ।
