काठमाडौँको कालिमाटीस्थित ज्योति अस्पतालमा रामेछापकी एक महिलाको मृत्यु भएको छ । मृतक अनिता घिमिरेका आफन्तले भने अस्पतालको लापरबाहीका कारण मृत्यु भएको आरोप लगाएका छन् ।

Advertisement 1

३ छोरीहरुकी आमा रहेकी अनिता पुनः गर्भवती थिइन् । तर, उनले असजिलो महशुस गरेपछि उनलाई आफन्तले ज्योति अस्पताल पुर्याएका थिए । अस्पतालले पेटमा पुनः छोरी रहेको जानकारी गराएपछि गर्भपतन गराउने योजनामा अनिता पुगेकी थिइन् ।

बिहान करिब ११ बजे भर्ना भएकी उनको अवस्था जटिल भएपछि बेलुका ८ बजे थप उपचारको निम्ति ग्वार्कोको बीएण्डबी अस्पताल रिफर गरिएको थियो । बीएण्डबी अस्पतालमा उपचारको क्रममा मृत्यु भए पनि ज्योति अस्पतालको लापरबाहीको कारण गर्भवतीको मृत्यु भएको भन्दै आफन्तहरुले हिजोदेखि अस्पतालमा बिरोध प्रदर्शन गरेका हुन् ।

Advertisement 2

मृतकका आफन्तहरुले अस्पतालमा नाराबाजी र बिरोध जारी राखेपछि हाल ज्योति अस्पताललाई महानगरीय प्रहरी वृत्त कालिमाटीबाट खटिएको प्रहरी टोलीले सुरक्षा दिइरहेको छ । हिजो अस्पताल प्रशासन र पीडित पक्षबीच सहमतिको निम्ति वार्ता भए पनि कुनै निश्कर्षमा नपुगेको बताइन्छ । सहमति नहुञ्जेल आफूहरुले आन्दोलन जारी राख्ने मृतकका आफन्तले बताएका छन् । २८ वर्षीया अनिता घिमिरे रामेछापको दोरम्बा गाउँपालिका ६ लखनपूरकी स्थायी बासिन्दा हुन् । उनका ३ छोरीमध्ये कान्छी छोरी जम्मा १५ महिनाकी छिन् ।