मोरङको बेलबारी नगरपालिकाले अष्ट्रेलियाको भनेर नवलपरासीको बाख्रा वितरण गरेको पाइएको छ । नगरपालिकाले जेठ १५ गते अष्ट्रेलियाबाट आयात गरेको ‘फूल ब्लड’ बोयर बोका भनी नवलपरासीबाट ल्याएको ९२ वटा बोयर बाख्रा विभिन्न ४४ वटा फर्म र केही किसानलाई वितरण गरेको हो ।

Advertisement 1

अष्ट्रेलियाबाट ‘फूल ब्लड’ बोयर बाख्रा ल्याउन जेठ ३ गते संखुवासभाको ग्रो अर्गानिक कृषि फर्मलाई एक करोड २४ लाख रुपैयाँमा ठेक्का दिएको थियो ।मोरङको बेलबारी नगरपालिकाको गेटमा सोमबार मध्यान्ह बेलबारीका सचेत युवाहरूको समूहले बाख्रा सहित प्रदर्शन गरेका छन् । दुई साताअघि बेलबारी नगरपालिकाले किसानहरूलाई अस्ट्रेलियाबाट चार्टर गरी ल्याएर फुल ब्लड बोयर जातको बाख्रा वितरण गरेको भन्दै किसानहरूको आँखामा छारो हालेको र १ करोड बढी नगरपालिकाले भ्रष्टाचार गरेको भन्दै सचेत युवाहरूले दबाबमूलक कार्यक्रमका रूपमा प्ले कार्ड झुन्डाइएका बोकासहित प्रदर्शन गरेका हुन ।

युवाहरूको समूहले आइतबार मात्र अख्तियार दुरुपयोग अनुसन्धान आयोग क्षेत्रीय कार्यालय इटहरीमा सोही विषयमा उजुरी समेत गरेका छन् । नवलपरासीबाट बाख्रा ल्याएर अस्ट्रेलियन बोयर भन्दै किसानको आँखामा छारो हाली भ्रष्टाचार गरेको भन्दै यति बेला बेलबारी नगरपालिकाको चौतर्फी आलोचना भइरहेको छ । हामी विदेशी बोका होइनौँ नेपाली बोका हौँ, हाम्रो घर नवलपरासी हो, हामीलाई विदेशी भन्न पाइन्न, हामी जहाज चढेर आएका होइनौँ, विदेशी भनेर हाम्रो बेईज्जत नहोस्, लगायतका दर्जनौ नाराहरू लेखिएका प्ले कार्ड झुन्डाइएका बोका सहित प्रदर्शन गरिएको हो ।

Advertisement 2

बेलबारीका सुजित बस्नेत,खेम गौतम,रिक्त गुरुङ, कमल सुब्बा, बिशाल थापा,ऐश्वर्यप्रसाद आचार्य (विपिन) लगायतका युवाहरूको नेतृत्वमा दर्जनौँ युवाहरू विरोध प्रदर्शन सहित नगरपालिका पुगेका थिए । अविरल वर्षाका बिच पनि उनीहरूले बोका सहित प्रदर्शन गरेका हुन ।
हल्ला भएपछि छानविन समिति

किसानले विरोध गरेपछि नगरपालिकाले उपप्रमुख ढाकाकुमारी पराजुलीको संयोजकत्वमा छानविन समिति गठन गरेको छ । समितिले प्रतिवेदन बुझाएपछि कारवाही प्रक्रिया अघि बढाउने प्रमुख प्रशासकीय अधिकृत शाहले बताए ।नगरपालिकाले भुक्तानी नपाएपछि सप्लायर्स कम्पनीका श्याम पाण्डेले बाख्रा नै फिर्ता मागेको नगरपालिका स्रोतले बताएको छ । तर किसानलाई वितरण गरिसकेकाले बाख्रा फिर्ता गराउन नसक्ने नगरपालिकाले जवाफ दिएको थियो ।नगरपालिका स्रोतका अुनसार बाख्रा आयात गर्ने फर्म पाण्डेको होइन । मोरङका ६ वटा स्थानीय तहको फोहर व्यवस्थापन र सौर्य उर्जाको सम्भाव्यता अध्ययनको जिम्मेवारी पाएका पाण्डेले नगरपालिकामा बाख्रा ल्याउने सेटिङ गरेर संखुवासभाका कृषकको फर्म प्रयोग गरेका स्रोतको दावी छ ।

‘हर्ताकर्ता पाण्डे नै भएपनि सम्झौता पत्रमा भने गोविन्द रायको हस्ताक्षर छ,’ बेलबारी नगरपालिका स्रोतले भन्यो, ‘भुक्तानीको तयारी हुँदै गर्दा ठगी भएको देखिएपछि सबै पछि हटे ।’बाख्रा खरिदमा भएको अनियमिततामा जोडिएपछि पाण्डेसँग सम्पर्क गर्दा उनले बोल्न चाहेनन् । ‘मलाई डाक्टरले नबोल्नु भनको छ,’ अनलाइनखबरसँगको सम्पर्कमा उनले भने,‘ अहिले म बोल्न सक्दिन बिरामी छु ।’स्रोतका अनुसार नवलपरासीबाट उक्त बाख्रा २५ देखि ३० हजार रुपैयाँ गोटा खरिद भएको थियो । सम्झौता पत्रमा हस्ताक्षर गरेका राय भने आफूलाई बाख्रा आयात गरेको विषयमा जानकारी नभएको बताए । आफू फर्मको प्रशासन हेर्ने कर्मचारी मात्रै भएको उनले बताए ।

ठेकेदार र नगरको बदमासीले किसान ठगिए

ठेकेदार र बेलबारी नगरपालिकाको बदमासीले बेलबारीका किसान ठगिएको नेपाल व्यावसायिक बाख्रापालक महासंघका केन्द्रीय अध्यक्ष प्रेमसागर पौडेलले बताए । ‘राज्य कोषको चरम दुरुपयोग हो, किसानमाथि अन्याय पनि भयो,’ उनले भने, ‘अष्ट्रेलियाबाट ल्याएको बाख्रा होइन, समूहका किसानले पालेको बाख्रा संकलन गरेर पठाएको सूचना छ ।’ बोयर जातका बाख्रामा हाडनाता क्रस भएको पाइए राम्रो उत्पादन नदिने भन्दै उनले विवरण नखुलेका बाख्रा वितरण गर्दा किसानको लगानी जोखिममा पर्ने बताए ।चितवनमा बोयर जातको बाख्रा पालन गरिरहेका एक कृषकका अनुसार नगरपालिकाले बोलपत्रमा उल्लेख गरेको फूल ब्लड बोयर जातको बाख्रा तत्कालै आयात गरेर दिनसक्ने अवस्था थिएन ।पियोर बोयर खोजेपछि आफूले टेण्डर नभरेको बताउँदै ती किसानले भने, ‘अष्ट्रेलियाबाट बाख्रा आयात गर्न सहज छैन, सम्झौताको १२ दिनपछि बाख्रा आउँदा नगरपालिकाले ध्यान दिनुपर्ने थियो ।’