उत्पादकत्व बढाउन नगद अनुदान
गोरखा। उत्पादकत्व बढाउन धार्चे गाउँपालिकाले किसानलाई नगद अनुदानको व्यवस्था गरेको छ। साथै पालिकाले उत्पादनका आधारमा गत आर्थिक वर्षमा रु ४ लाख ६७ हजार ५०० अनुदान वितरण गरेको जनाएको छ।
Advertisement 1
गाउँपालिकाको कृषि शाखाप्रमुख अनिल नेपालीका अनुसार उत्पादनका आधारमा व्यक्तिगत एवं समूहगत रूपमा किसानलाई अनुदान वितरण गरिएको हो। अन्न उत्पादन, नगदेबाली, पशुपालन एवं फलफूलखेती गर्नेलाई अनुदान उपलब्ध गराइएको हो।
नगद अनुदान कार्यक्रमका लागि ५ कृषि समूह, फलफूल तथा पशुपन्छी फार्म र १० जना किसानलाई प्रदान गरिएको हो।
Advertisement 2
अनुदान पाएका किसानले डल्ले खुर्सानी, ड्रागन फ्रुट, मौरीपालन, केराखेती, आलु तथा सुन्तलाखेती गरेका थिए। पालिकाले रु ९ हजारदेखि रु ५१ हजारसम्म अनुदान प्रदान गरेको छ।
पालिकाले अन्य किसानलाई पनि कृषि कर्ममा अभिप्रेरित गर्न अनुदानको व्यवस्था गरिएको बताउँदै उत्पादकत्व वृद्धिका कार्यक्रममा लाग्न शाखाप्रमुख नेपालीले पालिकाका सबै किसानलाई अनुरोध गरेकाछन्।
