काठमाडाैं। आन्दोलनरत संघीय संसद् सचिवालयका कर्मचारीका माग सम्बोधन गर्न राष्ट्रियसभा सदस्यहरुले जोड दिएका छन्। राष्ट्रियसभाको मंगलबारको बैठकमा सांसदहरुले घरभाडा समयानुकूल बनाउनुपर्नेलगायत ११ बुँदे मागसहित आन्दोलनरत कर्मचारीका मागबारे सरकारको ध्यानाकर्षण गराएका हुन्।

Advertisement 1

बैठकको विशेष समयमा सांसद मायाप्रसाद शर्माले कर्मचारीहरुको माग जायज रहेको उल्लेख गर्दै उनीहरुका मागमा ऐक्यबद्धता जनाए। ‘कार्यालय समयपछि पनि कतिपय कर्मचारीले काम गर्नुपर्ने भएकाले उहाँहरुलाई अतिरिक्त सेवा सुविधा उपलब्ध गराउनुपर्छ,’ उनले भने, ‘कर्मचारीहरुको तलब बृद्धि हुन सकेन, तलब बृद्धि गर्न सकेमा उहाँहरुलाई थप हौसला मिल्ने छ।’

सांसदद्वय श्रीकृष्णप्रसाद अधिकारी र नरबहादुर बिष्टले कर्मचारीको माग सम्बोधन जरुरी रहेको बताए। हाल राजपत्रांकित कर्मचारीले आवास भत्ताबापत ३ हजार ५ सय प्राप्त गर्दै आएका छन्। राजपत्रअनंकित र श्रेणीविहीन कर्मचारीका लागि प्रतिमहिना ३ हजार आवास भत्ता तोकिएको छ।

Advertisement 2

आन्दोलनरत कर्मचारीले राखेको ११ बुँदे मागको पहिलो बुँदामा घरभाडा वृद्धिको माग उल्लेख छ। संघीय संसद् सचिवालय कर्मचारी प्रशासन नियमावली २०६५ को अनुसूची १२ मा रहेको यो व्यवस्था पुनरावलोकन हुनुपर्ने उनीहरुको माग छ।