काठमाडौं । स्वास्थ्य तथा जनसंख्या मन्त्रालयले सरकारी अस्पतालमा कार्यरत चिकित्सक, स्वास्थ्यकर्मी तथा कर्मचारीको निगरानी बढाएको छ । मन्त्रालयले मातहतका चिकित्सक, स्वास्थ्यकर्मी तथा कर्मचारी अन्य निजी अस्पतालमा काम गरिहेको भन्दै निगरानी बढाएको हो ।

Advertisement 1

मन्त्रालयले मातहतका चिकित्सक, स्वास्थ्यकर्मी तथा कर्मचारीलाई जुन उद्देश्यले बिदा लिएको हो त्यसै अनुसार बिदा उपयोग गर्न निर्देशन दिएको छ । कतिपय चिकित्सक, स्वास्थ्यकर्मी तथा कर्मचारीले बिदा लिएर निजी स्वास्थ्य संस्था, गैरसरकारी संस्थामा काम गर्ने गरेको र केही विदेशमा समेत गई कार्य गरेको गुनासो मन्त्रालमया आएपछि मन्त्रालयले यस्तो निर्देशन दिएको हो ।

मन्त्रालयका सचिव मधुसुदन बुर्लाकोटीले सोमबार सबै प्रतिष्ठान, विभाग, अस्पताल र केन्द्रमार्फतमार्फत परिपत्र गर्दै आआफ्नो पदीय मर्यादा, व्यक्तिगत आचरण एवं पेसागत अनुशासनमा रही कार्य गर्न निर्देशन जारी गरेका हुन् । आफू जिम्मेवार रहेको निकायमा चिकित्सकीय तथा स्वास्थ्य सेवा प्रवाह नगरी गैर जिम्मेवारी पूर्ण कार्य गरेकोले प्रचलित कानून बमोजिम हदैसम्मको कारबाही गरी स्वीकृत गरेको बिदा रद्द गरिदिनको लागि विभिन्न निकाय तथा सेवाग्राहीबाट गुनासो प्राप्त भएकोप्रति गम्भीर ध्यानाकर्षण भएको सचिव बुर्लाकोटीले जारी गरेको निर्देशनमा उल्लेख छ ।

Advertisement 2

उनले निर्देशनमा भनेका छन्, ‘केही चिकित्सक तथा स्वास्थ्यकर्मी एवम् कर्मचारीले जुन उद्देश्यको लागि बिदा लिएको हो सोही अनुसार बिदा उपयोग नगरी निजी स्वास्थ्य संस्थामा विदेशी स्वास्थ्य संस्था एवम् गैरसरकारी संघ संस्थामा गई कार्य गरेको जानकारी प्राप्त हुन आएकोले त्यस्ता कार्य नगर्नु, नगराउनु हुन अनुरोध गर्दै आआफ्नो पदीय मर्यादा, व्यक्तिगत आचरण एवम् पेसागत अनुशासनमा रही कार्य गर्नुहुन यो निर्देशन जारी गरिएको छ ।’

सचिव बुर्लाकोटीबाट जारी निर्देशनमा थप भनिएको छ, ‘यस्ता क्रियाकलाप भए गरेको पाइएमा सम्बन्धित निकायले स्वीकृत गरेको बिदा रद्द हुनुका साथै कानून अनुसार हदैसम्मको कारबाही र त्यसको लागि सम्बन्धित व्यक्ति स्वयम् जिम्मेवार हुने ब्यहोरा जानकारी गराइन्छ । साथै स्वदेशी तथा विदेशी निजी संस्थाले सरकारी चिकित्सक, स्वास्थ्यकर्मी हुनुपर्ने एवम् कर्मचारीले त्यस्तो कार्य भए गरेको देखिएमा यस मन्त्रालय तथा सम्बन्धित निकायमा जानकारी गराउन मन्त्रालय हार्दिक अनुरोध गर्दछ ।’