काठमाडौं । सरकारले नेपाल प्रहरीमा प्राविधिकतर्फ दुई प्रहरी नायव महानिरीक्षक (डीआईजीपी)को दरबन्दी थप गरेको छ । प्रहरी प्रधान कार्यालयले केन्द्रीय अनुसन्धान ब्युरो (सीआईबी)मा साइबर हेर्ने र केनाईन महाशाखामा डीआइजीको दरबन्दी राख्नुपर्ने प्रस्ताव अनुसार बिहीबार बसेको मन्त्रिपरिषद् बैठकले दरबन्दी स्वीकृत गर्ने निर्णय गरेको हो ।

Advertisement 1

दुबै पदमा कार्यकाल समाप्त भएपछि स्वतः खारेज हुने गरी प्राविधिक प्रहरी समूहतर्फ दुई डीआईजीपीको विशेष पद सिर्जना गर्ने निर्णय गरेको सरकारका प्रवक्तासमेत रहेका सञ्चार तथा सूचना प्रविधिमन्त्री रेखा शर्माले मन्त्रालयमा आयोजित नियमित पत्रकार सम्मेलनमा जानकारी गराईन । साइवर ब्युरोका एसएसपी नबिन्द अर्याल र केनाइनकी एसएसपी देवती गुरुङको पुगनपुग एक वर्ष मात्रै अवधि बाँकी रहेको छ । उनीहरुलाई नै लक्षित गरेर दरबन्दी सृजना गरिएको प्रहरी प्रधान कार्यालय स्रोतले जनाएको छ ।

बैठकले महालेखापरीक्षकमा सिफारिस भएका राष्ट्रिय तथ्यांक कार्यालयका सचिव तोयम रायको राजीनामा स्वीकृत पनि गरेकाे छ । रायलाई केही दिनअघि बसेको संवैधानिक परिषद्को बैठकले रिक्त रहेको महालेखापरीक्षकमा नियुक्तिका लागि सिफारिस गर्ने निर्णय गरेको थियो ।सञ्चारमन्त्री शर्माका अनुसार उक्त बैठकले नेपाल वन सेवा, फरेष्ट रिसर्च समूह, राजपत्रांकित प्रथम श्रेणीका सहसचिव रावित्री अर्यालले दिएको राजीनामा पनि स्वीकृत गरेको छ ।

Advertisement 2

बैठकले संयुक्त राज्य अमेरिकाको सान डिएगो, क्यालिफोर्नियाका लागि अवैतनिक नेपाली महावाणिज्यदूत ऋषि पुनाखर ढकाल र जर्मनीको नर्थ राइन, वेष्टफालिया ब्रेमेन र लोअर स्याक्सोनी क्षेत्रका लागि अवैतनिक महावाणिज्यदूत रामप्रताप थापाको पदावधि थप गर्ने निर्णय गरेको छ ।