काठमाडौं । भ्रष्टाचार गरेको अभियोगमा स्वास्थ्य निर्देशनालयका निर्देशक चन्द्रदेब मेहता, लेखा अधिकृत, इन्जिनियरसहित छ जना विरुद्ध अख्तियार दुरुपयोग अनुसन्धान आयोगले मुद्दा दायर गरेको छ । स्वास्थ्य सामाग्री खरिदमा बढी कबोल गर्ने कम्पनीलाई ठेक्का दिएको आरोपमा स्वास्थ्य निर्देशनालय धनकुटाका तत्कालिन निर्देशक चन्द्रदेब मेहतासहित ६ जना विरुद्ध आयोगले विशेष अदालत काठमाडौँमा मुद्दा दायर गरेको हो ।

Advertisement 1

आयोगले निर्देशक मेहता, हाइ डिपेण्डेन्सी युनिट (एसडियु) खरिद मुल्यांकन समितिका सदस्य तथा प्रदेश स्वास्थ्य व्यवस्थापन केन्द्रका बायोमेडिकल इन्जिनियर कुशल दाहाल, एसडियुको उपकरण खरिद मूल्यांकन समितिका सदस्य स्वास्थ्य निर्देशनालयका लेखा अधिकृत डण्डरसिंह विश्वकर्मा, खोप अधिकृत उदेश कुमार श्रेष्ठविरुद्ध मुद्दा दायर गरेको हो । सामान उपलब्ध गराउने हस्पिटिक इन्टरप्राइजेज प्राइभेट लिमिटेडका तीनकुने र त्यसका व्यवस्थापनक मनोजकुमार आचार्यलाई पनि विपक्षी बनाएको छ ।

स्वास्थ्य सामाग्री खरिदका लागि गरिएको आह्वानमा तीन वटा बोलपत्र दर्ता हुन आएकोमा तीनवटैलाई अस्वीकृत गर्नुपर्नेमा बढी कबोल गर्नेलाई ठेक्का दिएको भन्दै मुद्दा दायर गरेको आयोगका सहसचिव एवम प्रवक्ता नरहरी घिमिरेले जानकारी दिए । तेस्रो हुने र पहिलो हुने फर्मले गरेको कवोल रकमको अन्तर दुई करोड आठ लाख ६६ हजार ५० रुपैयाँ छ । आयोगले त्यति नै रकममा बिगो कायम गरेको उनले बताए ।

Advertisement 2

आइतबार दिउसो नै आयोगले कपिलवस्तुको महाराजगञ्ज नगरपालिकाका एक वडा अध्यक्षलाई घुस रकमसहित कार्यकक्षबाटै नियन्त्रणमा लिएको छ । घर सडक नक्सा पास गर्ने नाममा घुस लिएको आरोपमा नगरपालिका दुईका वडाध्यक्ष अजिर अलीलाई नियन्त्रणमा लिएको हो । १५ हजार नगदसहित उनलाई नियन्त्रणमा लिइएको र थप अनुसन्धान भइरहेको जनाइएको छ ।