२७ वर्षको सरकारी सेवामा, २४ वर्ष मालपोत छाडेर उनै बाहिर जानुपरेको छैन उपसचिव लोकबहादुर भण्डारीलाई । उनीमात्र होइन उनका दुई भाइ पनि मालेपोतकै हाकिम ।

Advertisement 1

०२५ सालका लोक,०२६ सालका देवी र ०२८ सालका शेर, तिनै भाइ लामो समयदेखि मालपोतमा जरा गाढेर बस्दै आएका थिए,अहिले तीनै जना उपसचिव (मालपोत कार्यालयका हाकिम) । जेठा भण्डारी भूमिसुधार तथा मालपोत कार्यालय भक्तपुरका हाकिम,भाई देवी कपिलबस्तु र कान्छा शेर झापा मालपोतका हाँक्दैछन् । रोचक चाहिँ जागिरे जीवनमा लामो समय उनीहरु मालपोतबाट दायाँबायाँ हुनु परेको छैन,निजामती किताबखानाबाट प्राप्त पिआइएस हेर्दा ।

०५३ सालमा शाखा अधिकृतबाट निजामती सेवा प्रवेश गरेका भण्डारीले जागिरे जीवनमा व्यतित गरेका २७ मध्ये २४ बर्ष मालपोतमै व्यतित गरेका छ । मालपोत दमक,सुनसरी,ललितपुर हुँदै डिल्लीबजार मालपोतमा बसे । विशेष बढूवाबाट उपसचिवमा उक्लिएपछि छोटो समय उपराष्ट्रपति कार्यालय,इलाम नगरपालिका,प्रदेश सभा सचिवालयमा बसेर सेवा गरे बाहेक जागिरे जीवनका बाँकी समय मालपोतमै बिताएको उनको पिआइएस खोतल्दा भेटिन्छ । मालापोत काभ्रेपलाञ्चोकको हाकिम हुँदै ०७७ साल चैत्र मा मोरङ्ग मालपोतका हाकिम हुन गएका उनी गत बर्ष भदौं १६ देखि भक्तपुर मालपोतका हाकिमका रुपमा कार्यरत छन् । अहिले भतिज मोहन भण्डारी र ज्वाई डम्बर कार्कीलाई समेत सोही अड्डामा लिएर गएका छन् । हालैमात्र भण्डारीलाई त्यहाँबाट सरुवा गर्ने गृहकार्य अगाडि बढ्यो । सरुवा उल्टाए उनी पूरानै ठाउँमा फर्किन सफल भए ।
यस अघि स्थानीय तहमा भइसकेको सरुवा समेत भण्डारीले तत्कालीन सचिव कृष्णहरि पुष्करलाई प्रयोग गरेर उल्टाएको सामान्य प्रशासन मन्त्रालयले जनाएको छ ।

Advertisement 2

अहिले भक्तपुर मालपोतको उनै हाकिम भण्डारीका दायाँ–बायाँ हात मानिने दुई खरिदारलाई सामान्य प्रशासनले थुतेर लगेपछि सोही अड्डामा फर्काउन न्वारानदेखिको बल लागेको । पाँच वर्षभन्दा लामो समयदेखि भक्तपुर मालपोतको रजिष्ट्रेसन, मुद्दा शाखामा बसेर तर मार्दै आएका दुई खरिदारलाई सोही कार्यालयमा फर्काउन उपसचिव भण्डारीले भए भरका शक्ति प्रयोग गरिरहेका छन् ।

संघीय मामिला मन्त्रालयले एउटै कार्यालयमा ४ वर्षभन्दा लामो समयदेखि बस्दै आएको भन्दै उनीहरूलाई गृह मन्त्रालय मातहत खटाएको थियो । उक्त सरुवा उल्टिएको छ ।

गत ५ मंसिरमा गृहअन्तर्गत भएको सरुवा बदर गरी पुनः भूमि व्यवस्था मन्त्रालयमै फर्कन सफल उनीहरूलाई त्यहाँबाट भूमिव्यवस्था मन्त्रालय मातहतकै कार्यालयमा सरुवा गरियो । खटाइएको निम्सरो कार्यालयमा एक दिन पनि हाजिर नभई ती भूमि तथा अभिलेख विभागतिर गइसकेका छन् । मंसिर ५ गते हरिशरण न्यौपानेको हस्ताक्षरित पत्रमा यी दुबैलाई भूमि आयोग र समस्याग्रस्त सहकारी कार्यालय हेर्ने गरी खटाइएको थियो । तर, खटाइएको ठाउँमा १५ दिन बित्दा पनि हाजिर भएनन् । भूमि आयोगको शाखा अधिकृत (कप्र हेर्दै आएका) उमेशहरि अधिकारीका अनुसार, १५ दिन अगावै मन्त्रालयबाट आयोगमा खटाइएको पत्र आएको भए पनि राई बुधबारसम्म त्यहाँ हाजिर हुन पुगेका छैनन् । यस्तै समस्याग्रस्त सहकारी संस्थाका केशवप्रसाद पौडेलले पनि कोइराला त्यहाँ हाजिर हुन नआएको बताए ।

यी दुबै भाइ मन्त्री रञ्जिता श्रेष्ठको सचिवालयबाट सेटिङ मिलाएर बबरमहलस्थित भूमि तथा अभिलेख व्यवस्थापन विभागमा सरुवा भइसकेका छन् । महानिर्देशक विदुर खनालले संघीय मामिला तथा सामान्य प्रशासनको परिपत्रका कारण तत्काल त्यसरी खटाउन नसकिने प्रतिक्रिया दिए ।

सामान्य प्रशासन मन्त्रालयले गत मंसिर १२ गते एक परिपत्र जारी गर्दै राजपत्र अनंकित द्वितीय श्रेणी अर्थात खरिदार वा सोसरहका कर्मचारीको सरुवा तथा पदस्थापन आगामी फागुन मसान्तसम्मलाई स्थगन गरेको छ । लामो समयदेखि सुगम स्थानमा रहेर काम गरिरहेका तर बढुवा प्रयोजनका लागि मात्र दुर्गम जाने क्रम बढेपछि यसरी रोकिएको परिपत्र गरेको केही दिनपछि भूमिव्यवस्था मन्त्रालयले खरिदारद्वय कोइराला र राईलाई विभागमा सरुवा गरेको थियो । यी दुई भाइलाई भक्तपुर मालपोतमै फर्काउन त्यहाँका हाकिम लोकबहादुर भण्डारीदेखि निजामती कर्मचारी युनियनका नेतादेखि भूमि सुधार मन्त्रीको सचिवालयका कर्मचारीलाई प्रयोग गरेको चर्चा छ ।