एमाले निकट नेपाल निजामती कर्मचारी संगठनको सदस्य बन्न कमाइ हुने आकर्षक कार्यालय,त्यसमा पनि लेखाको कर्मचारी हुनुपर्ने एउटा तथ्य भेटिएको छ । संगठनको पदाधिकारीहरुको सूची खोतल्दा कमाइ नहुने कार्यालयका कर्मचारीलाई संगठनभित्र छिर्नै नदिइएको देखिन्छ । कमाइ हुने कार्यालयका कर्मचारीलाई तानीतानी संगठनमा राखिन्छ । एमालेसम्बद्ध निजामती कर्मचारी संगठनले यस्तै गरेको छ । उसले हुलाक, जिविसजस्ता निम्सरा कार्यालयमा कार्यरत कर्मचारीलाई हेर्ने त के, अगाडि आए देखेको नदेख्यै गर्ने गर्छ । ‘टीके’ प्रथाबाट लिलाम बढाबढमा पद बाँडिने रोगले कर्मचारी संगठन आक्रान्त छ ।

Advertisement 1

०७३ यताको ५ वर्ष नेपाल निजामती कर्मचारी संगठनको अध्यक्ष चलाएका केदार देवकोटाले पद छाड्ने बेलामा संगठनको पदाधिकारीको पद लिलाम बढाबढ गरी बाँडे, द्रव्य संकलन गरेको कुरा संगठनभित्रै ‘भुसको आगोझैं’ फैलिरहेको छ । एउटा घर सिन्धुली, गोलनजोर गाउँपालिका र अर्काे भक्तपुरको लोकन्थलीमा चार आनाको जग्गामा साढे तीन तलाको बंगला ठडाएका छन् । यस्तै सिन्धुलीको ढुंग्रेबासमा ६ कठ्ठा जग्गा जोडेको चर्चा व्यापक छ । यसरी घर निर्माण गर्दा आर्थिक सहयोग गर्ने कर्मचारीलाई छानी–छानी संगठनमा ल्याएको आरोप एकाथरी एमाले निकट कर्मचारीहरुले लगाउँदै आएका छन ।

पूर्वअध्यक्ष केदार देवकोटा र वर्तमान अध्यक्ष लेखनाथ कोइराला, दुबै लेखा समूहका कर्मचारी हुन् । यी दुबै मिलेर बोलकबोलमा संगठनमा डनवादी र धनवादी कर्मचारीलाई पदाधिकारीका रुपमा भित्र्याएका छन् । १ सय ५१ सदस्यीय केन्द्रीय कार्यसमितिमा झण्डै एक तिहाई लेखाकै कर्मचारीको बोलवाला देखिन्छ । निवर्तमान अध्यक्ष केदार देवकोटा आफैं लेखा अधिकृत, अध्यक्ष लेखनाथ कोइराला सोही दर्जामा मीनभवनस्थित सिभिल अस्पतालमा कार्यरत छन् । दधिराम मरासिनी, मोहनकुमार भट्टराई, ताराप्रसाद निरौला पनि लेखा अधिकृत हुन् । लेखापालहरू तेजप्रकाश भण्डारी, गणेशप्रसाद आचार्य, केशवराज जोशी, यामकुमारी सापकोटा, कवि तिमिल्सिना, राजेन्द्रकुमार कार्की, लेखनाथ पौडेल, मानप्रसाद खत्री, वन्दना लिम्बूलाई संगठनमा महत्वका साथ जिम्मेवारी दिइएको छ । त्यहाँ सुरेन्द्रबहादुर शाही (लेखा अधिकृत–सातौं) लगायतले अवसर पाएका छन् । यसरी अवसर पाउनेमा ५० हाराहारी लेखाका कर्मचारी छन् ।
के एमाले कर्मचारी संगठनमा आबद्ध हुन्, माथिल्ला पदमा पुग्न लेखाकै कर्मचारी हुनुपर्ने हो ? एमाले समर्थक अर्काे कर्मचारीको प्रश्न हो यो । यसरी संगठनमा लेखाका कर्मचारी मात्र थुपारेर केदार केही अघि मात्र अर्थबाट बूढानीलकण्ठ नगरपालिका पुगेका छन्, लेखा अधिकृतको रूपमा । बाग्मती प्रदेशका तत्कालीन प्रमुख सचिव (हाल उद्योग, वाणिज्य सचिव) मुकुन्द निरौलालाई ‘भेटी’ चढाएर निवर्तमान अध्यक्ष केदार देवकोटा बूढानीलकण्ठ नगरपालिकामा पुगेका हुन् । त्यहाँ गोविन्दराज शिवाकोटी र होमबहादुर खड्कालाई तेस्रो पटक केन्द्रीय कार्यसमितिमा राखिएको प्रति चित्त दुखाइ छ केही कर्मचारीको । जबकि ५५ सालदेखि संगठनमा कार्यरत र संगठनकै लागि पसिना बगाएका होमशंकर बास्तोला, विमल श्रेष्ठ, अनुप ढकालदेखि कर्णाली प्रदेशका धेरै कर्मचारीलाई बाइपास गरिएको छ ।