हुम्लाको सिमकोट गाउँपालिकाले जिल्ला बाहिरका प्रमुख प्रशासकीय अधिकृत नपठाउन संघीय मालिमा तथा सामान्य प्रशासन मन्त्रालयलाई अनुरोध गरेको छ ।संघीय मामिला तथा सामान्य प्रशासन मन्त्रालयले प्रमुख प्रशासकीय अधिकृतको जिम्मेवारी दिएर हालैमात्र अधिकृत सुवास आलेलाई खटाएको छ । सामान्य प्रशासनको यो निर्णय पछि सिमकोटको उपाध्यक्षले कार्यपालिकाको बैठक नै डाकेर जिल्लाभन्दा बाहिरको प्रमुख प्रशासकीय अधिकृत नपठाउन सामान्य प्रशासन मन्त्रालयलाई आग्रह गरेको हो ।

Advertisement 1

पालिकाको उपाध्यक्ष सुशीला रोकायाको अध्यक्षतामा बसेको कार्यपालिको बैठकले जिल्ला बाहिरका अधिकृत नपठाउन संघीय मामिला तथा सामान्य प्रशासन मन्त्रालयलाई अनुरोध गरेको हो ।

कार्यपालिकाको बैठकले विभिन्न १० वटा निर्णय गरेका छन् । जसमा निर्णय नम्बर १० मा जिल्ला बाहिरका कर्मचारीलाई पालिकाको प्रमुख प्रशासकीय अधिकृत बनाएर खटाउँदा ती कर्मचारी जिल्लामा नबस्ने हुँदा गाउँपालिकाबाट जनतालाई सेवा दिने क्रममा असुविधा हुने र बेला बेलामा जिल्ला बाहिर गइ काममा बाधा पर्ने,र तीन चार बर्षसम्म स्थानीय तहको सातौ अधिकृतले मन्त्रालयबाट नै प्रमुख प्रशासकीय अधिकृतको जिम्मेवारी पाइ कामकाज गर्दै आएको र गाउँपालिकाबाट दिने सेवा सुविधा छिटो छरितो भएको,बाह्रै महिना जनताले सेवा पाएको हुँदा मन्त्रालयबाट अर्को प्रमुख प्रशासकीय अधिकृत नखटाइदिनु हुन अनुरोध गर्ने कार्यपालिका बैठकले निर्णय गरेको छ ।

Advertisement 2

त्यहाँ अहिले निमित्त प्रमुख प्रशासकीयको जिम्मेवारीमा उजिर रोकाया कार्यरत छन् । रोकाया उपाध्यक्ष सुशीला रोकायाको श्रीमान हुन ।आफ्ना श्रीमानलाई पालिकामै टिकाइराख्नका लागि उपाध्यक्षले कार्यपालिकाको बैठक डाकेर यस्तो निर्णय गरेको बताइएको छ ।

यो निर्णयप्रति पालिकाको प्रवक्ता नन्द रावतले नोट अफ डिसेन्ट (फरक मत) राखेका थिए ।

प्रमुख प्रशासकीय अधिकृतको खटन पटन संघीय मामिला तथा सामान्य प्रशासन मन्त्रालयले गर्दै आएको छ । संघीइ मन्त्रालयको खटन पटनप्रति स्थानीय सरकारले यस्तो निर्णय गर्न मिल्छ त ? भन्ने इकर्मचारी डटकमको प्रश्नमा  उपाध्यक्ष सुशीला रोकायासँग जिज्ञासा राख्दा पालिका बाहिरको प्रमुख प्रशासकीय जिल्लामा धेरै नबस्ने हुँदा जनतालाई सेवा दिने क्रममा असुविधा हुने गरेको उल्लेख गर्दै उनले आफूहरुले कुनै लोभ,लालचका कारण यस्तो निर्णय नगरेको सुनाइन ।

स्थानीय तहलाई गाउँको सिंहदरबार भन्छन्,तर अचानोको चोट खुकुरीलाई मात्र थाहा हुन्छ । हामीलाई विकास चाहिएको छ । भनेको समयमा कर्मचारी नहुँदा काम गर्न अप्ठ्यारो हुने हुँदा स्थानीय तहकै कर्मचारीलाई कार्य गराउन सामान्य प्रशासनलाई आग्रहसम्म गरिएको उनको प्रतिक्रिया छ ।सामान्यले पठाएको खण्डमा आफूहरुले हाजिरै गर्न नदिने नभनेको प्रतिक्रिया छ,रोकायाको ।

हालैमात्र संघीय मामिला तथा सामान्य प्रशासन मन्त्रालयले हुम्ला जिल्लाका सात वटै पालिकामा प्रमुख प्रशासकीय खटाएको छ । ताँजाकोट गाउँपालिकामा सजना कार्की र सर्केगाड गाउँपालिकामा शान्ति लामा, अदाचनचुली गाउँपालिकामा गिमन थापामगर, चंखेली गाउँपालिकामा सीताराम राईलाई खटाएको छ भने खार्पुनाथ गाउँपालिकामा रमेश सुनुवार, सिमकोट गाउँपालिकामा सुवास आले र नाम्खा गाउँपालिकामा शैलेशकिशोर राई चाम्लिङलाई स्थानीय तहको प्रमुख प्रशासकीय अधिकृतका रूपमा खटाइएको छ।बर्षाैदेखि यी स्थानीय तह निमित्तकै भरमा चल्दै आएका थिए ।