२०१३ भाद्र २२ गते निजामती सेवा ऐन जारी भएको दिनको सम्झनामा २०६२ साल देखि हरेक वर्ष निजामती सेवा दिवस मनाइदै आएको छ । २०१३ भाद्र २२ निजामती सेवाको लागि एउटा कोशेढुंगा सावित भएको छ । तत्कालीन प्रधानमन्त्री टंक प्रसाद आचार्यको दूर दृष्टि र सोचको परिणाम स्वरुप आएको निजामती सेवा ऐन योग्यता प्रणालीको एउटा आदर्श दस्तावेज र सेवा सुरक्षाको प्रत्याभूति गर्ने अनुकरणीय प्रतिविम्व बन्न सफल भएको छ । यसै मूल जगमा आधारित रहेर विगत ६७ वर्ष देखि निजामती सेवा संचालन हुदै आएको छ निजामती सेवामा सुधारका कामहरु यसै परिवेशमा संचालन हुदै आइरहेका छन् ।

Advertisement 1

२००७ देखि २०१५ साल सम्मो नेपालको राजनीति अस्थिर थियो राजनीतिक प्राथमिकता फरक थिए प्रशासन सुधारको विषय प्राथमिकतामा थिएन तर टंक प्रसाद आचार्यले यिनै प्रतिकूलताका वीचमा २०१३ साललाई प्रशासनिक तथा आर्थिक सुधारका बलियो मियो तयार गरे । गर्न चाहनेलाई कसैले रोक्दैन नचाहनेलाई नाच्न जान्दैन आगन टेढो भनेजस्तो । टंक प्रसादलाई केहीले रोकेन अहिलेकालाई के ले रोकेको हो थाहा छैन।

नेपालले संघीय प्रणाली अवलम्बन गरेको ८ वर्ष भैसकेको छ तर यो ८ वर्षमा नयां राजनीतिक प्रणाली अनुरुपको संघीय निजामती सेवा ऐन ल्याउने तदारुकता र चासो कसैमा देखिएन । संघीय संरचना अनुरुप कर्मचारीको व्यवस्थापन गर्दा केही सीमित निर्णयकर्ताको संकुचित मानसिकताको कारणले अधिकांश निजामती कर्मचारीलाई समायोजन दुखद पीडा बन्न पुग्यो जसवाट उनीहरु अझै पनि प्रताडित छन् ।त्यो पीडामा मल्हम लगाउन कोही तत्पर भएनन् । टंक प्रसाद आचार्यले भित्र्याएको योग्यता प्रणाली लोकसेवा आयोगको संलग्नता हुने क्षेत्र वाहेक सवै ठाउंमा निर्बस्त्र हुन पुगेको छ । हाम्रा मान्छेको नाममा राम्रा मान्छेहरु पाखा लाग्नु पर्यो यो प्रवृत्ति नराम्ररी झाँगिदै गएको छ यसको फल केही सीमित वर्गले चाखिरहेका छन् ।

Advertisement 2

यो ८ वर्षमा न प्रधानमन्त्री न सामान्य प्रशासन मन्त्री न मुख्य सचिव न ट्रेड यूनियन कोही पनि टंक प्रसाद आचार्य बन्न चाहेनन् किनकी यी कसैलाई पनि निजामती सेवा ऐन चाहिएको छैन । चाहिएका त प्रदेश र स्थानीय तहमा छन् तिनीहरुको आवाज किन सुन्नु पर्यो किनकी हुदा हुदैको मुख्य सचिव छोडेर दाताको कर्मचारी बन्ने प्रस्ताव तयार गर्ने र स्वीकृति दिने हामी काठमाण्डौमै छौं ।दुइ -तीन दिन भित्रैमा अवकाश लिएर पेन्सन पट्टा लिनु पर्ने व्यक्तिले जादू सरि नयां पद पाउन हामीलाई नयां निजामती सेवा ऐन चाहिएको छैन । आफ्नो लागि आफै कानूनमा नभएको पद सिर्जना गरि आफै कार्यविधि बनाइ आफै मन्त्री सरहको सेवा सुविधा तोक्न र निर्णय गराउन हामीलाई नयां निजामती सेवा ऐन चाहिएको छैन ।

केही महानुभावहरु जो प्रदेश वा स्थानीय तहमा जानु आवश्यक छैन पठाउनु पर्ने निर्णयकर्ताहरु पनि उहाहरुलाइ प्रदेश र स्थानीय तहमा पठाउनु नपर्ने काममा मरिमेटेर लाग्नु हुन्छ । प्रदेश र स्थानीय तहमा गएका ती थांग्नेहरुलाइ पो निजामती सेवा ऐन चाहिएको हो ।प्रदेश र स्थानीय तहमा गएका ती थांग्नेहरु जसको वृत्ति विकास सुनिश्चित छैन जसको पेन्सन सुनिश्चित छैन अझै कति दिन कुर्ने नयां निजामती सेवा ऐनको लागि यिनीहरुले ? हे काठमाण्डौमा शयर गरिरहनु भएका महानुभावहरु कहिले यिनको पीडा बुझ्ने प्रयास गर्नु भएको छ ? प्रदेश र स्थानीय तहमा गएका ती थांग्नेहरुको लागि बेलाबखत निर्देशन दिन पछि पर्नु हुन्न तपाइहरु तपाइहरुले जान्ने नै निर्देशन दिने हो । अव यिनीहरुलाइ निर्देशन होइन निजामती सेवा ऐन दिनोस त्यो पनि यसै वर्षको भदौ २२मा ।

अझ अर्को नाटक गर्न व्यस्त छन् हाम्रा नेतृत्वहरु २०७२ पछि तुरुन्तै निजामती सेवा ऐन जारी गर्नु पर्नेमा संघीय निजामती सेवा ऐन ल्याउन कुनै पहल नगर्नेहरु भदौ २२ मा वृक्षारोपण रक्तदान खेलकुद कार्यक्रम आयोजना गर्दैछन् लाज पचेपछि हुने यहि नै हो । अझ अहिले आएर काठमाण्डौ महानुभावहरु अतिरिक्त सचिव राख्ने नराख्ने विषयमा झगडा गरिरहनु भएको छ यसमा नमाने आन्दोलन गर्ने रे । निजामती सेवा ऐनन नल्याउदा आन्दोलन गर्छौ भनेर भन्नु हुन्न किन ?यसमा ट्रेड यूनियन सवभन्दा बढी रमिते बनेको छ र फड्के किनाराको साक्षी बनेको छ किनकी उ आफूलाई थाग्नेको कोटीमा राख्न चाहदैन । शायद टंक प्रसाद आचार्य यो दृष्य देखेर रोइरहेका होलान र भनिरहेका होलान हे निर्णयकर्ता र फड्के किनाराको साक्षी मनुवाहरु हो मैले ल्याएको भाद्र २२ मा एउटा इँटा त थप यस अघि नयां निजामती सेवा ऐन जारी गर्न त सकेनौ यसै वर्ष भाद्र २२ गते नयां निजामती सेवा ऐन जारी गर अनि त्यहि दिन दीपावली वृक्षारोपण रक्तदान खेलकुद कार्यक्रम जे जे मन लाग्छ आयोजना गर ।

हामी कसैलाई पनि टंक प्रसाद आचार्यलाई रुवाउने छूट छैन उनको पदचिन्हलाई अनुसरण गर्ने अवसर हामी संग छ । सम्माननीय प्रधानमन्त्रीज्यू अग्रसर हुनुहोस तपाईलाई नयां टंक प्रसाद आचार्य बन्ने अवसर छ । माननीय संघीय मामिला तथा सामान्य प्रशासन मन्त्रीज्यू आफू तात्नुहोस र सम्माननीय प्रधानमन्त्रीज्यूलाइ तताउनुहोस यहि वर्ष भदौ २२ गते संघीय निजामती सेवा ऐन जारी गरौ भनेर । श्रीमान मुख्य सचिवज्यू तपार्इको विज्ञता देशले यहांनिर पनि खोजेको छ । ट्रेड यूनियनका नेताहरु सवै समिति र सरुवामा आफ्नो भागवण्डा खोज्नुहुन्छ । यसै वर्ष भदौ २२ गते संघीय निजामती सेवा ऐन जारी गरौ भनेर किन दवाव दिनु हुन्न कता गयो तपाईहरुको आन्दोलन ?

तपाइहरु सवै संसद चलेको अवस्थामा संसदीय प्रक्रियावाट नचलेको अवस्थामा अध्यादेशवाट भदौ २२ गते नै संघीय निजामती सेवा ऐन जारी गर्न किन पहल गर्नु हुन्न ? यसैले यस पटक टंक प्रसाद आचार्यलाई नयां रुपमा सम्झौ उनको पदचिन्हलाई अनुसरण गरौ भाद्र २२ गते नै नयां निजामती सेवा ऐन जारी गरौं निजामती सेवा दिवसलाई ऐतिहासक बनाउं।