नेपाल आयल निगम गण्डकी प्रदेश कार्यालयबाट डिजेल चोरी गरी बिक्रीका लागि लैजाँदै गरेको घटनामा नाम जोडिएका कार्यालय प्रमुख चित्तरञ्जन दासलाई निलम्बन गरिएको छ । घटनाको छानबिन नसकिँदासम्मका लागि निगम गण्डकी प्रदेश कार्यालय प्रमुख दासलाई निलम्बन गरिएको निगमका प्रवक्ता मनोज ठाकुरले जानकारी दिए ।

Advertisement 1

दासले शुक्रबार दिउँसो पश्चिमाञ्चल पेट्रोल पम्पका लागि लोड भएको ग २ ख ८३६ नम्बरको ट्यांकरमा डिजेल चोरी गरी बिक्रीका लागि पठाएको सूचनाका आधारमा कास्कीका प्रमुख जिल्ला अधिकारी वासुदेव घिमिरेको आदेशमा प्रहरीले पक्राउ गरेको थियो ।

डाँडाकोनाक प्रहरीचौकीमा नापजाँचका क्रममा १२ हजार लिटर क्षमताको उक्त ट्यांकरमा १५ हजार लिटर डिजल लोड गरिएको फेला परेको प्रहरीले जनाएको छ । पेट्रोल पम्पले किनेको भन्दा ३ हजार लिटर थप चोरीको डिजेल रहेकोले दासलाई पक्राउ पुर्जी जारी भएको हो ।

Advertisement 2

दासमाथि डिपोको लागि तोकिएको नोक्सानी लक्ष्यको दुरुपयोग गरी इन्धन चोरी गर्ने गरेको आरोप छ । दास प्रदेश प्रमुख बनेपछि गण्डकीमा निगमले अघिल्लो वर्षभन्दा दोब्बर नोक्सानी व्यहोरेको निगम केन्द्रीय कार्यालयको प्रतिवेदनमा उल्लेख छ ।

पेट्रोलियम प्रदार्थ ढुवानीमा अनियमितता भएको सूचना पाएपछि बिहीबार साँझ जिल्ला प्रशासन कार्यालयका शाखा अधिकृत नवराज बरालको नेतृत्वमा इलाका प्रहरी कार्यालय हंसपुरका प्रमुख (प्रहरी नायब निरीक्षक) प्रकाश दाहाल, गुणस्तर तथा नाप तौल कार्यालयका प्रतिनिधि र स्थानीयवासीसमेतको संलग्नतामा सो ट्यांकरलाई चेकजाँच गरिएको थियो । त्यसक्रममा बिलमा उल्लेख भएभन्दा तीन हजार दुई सय लिटर बढी डिजेल फेला पारेको थियो । पोखराका पम्पलाई निगमले सम्बन्धित पम्प सञ्चालककै ट्यांकरबाट इन्धन वितरण गर्दै आएको छ । जिप्रकाले नियन्त्रणमा लिएको ट्यांकर पनि पश्चिमाञ्चल ट्रेडर्स नामको पेट्रोलपम्प सञ्चालक बाबुराम जमरकट्टेलको हो । उनी लेखनाथ उद्योग वाणिज्य संघको दुई कार्यकाल अध्यक्ष भइसकेका छन् भने अहिले नेपाल पेट्रोलियम डिलर्स राष्ट्रिय एसोसिएसनका केन्द्रीय सदस्य छन् ।