अख्तियार दुरुपयोग अनुसन्धान आयोगले लोकसेवा कक्षामा व्यस्त रहने २ दर्जन बढी प्रशासकहरु विरुद्ध चिठ्ठी काटेको जनाइएको छ । सिंहदरबारमा कार्यरत  अधिकृतदेखि सचिव तहसम्मका कर्मचारीहरु  सरकारको कामभन्दा लोकसेवा तयारी कक्षा पढाउनतिर बढी ब्यस्त हुने गरेको उजुरी परेपछि अख्तियारले त्यस्ता प्रशासकहरुलाई पत्र काटेको हो ।
उजुरीकर्ताहरुले अख्तियार दुरुपयोग अनुसन्धान आयोगमा दायर गरेको उजुरीमा,सिंहदरबारका अधिकांश मन्त्रालयका अधिकृतदेखि सचिवसम्मका कर्मचारीहरु कार्यालयको कामकाजै छाडेर निजी इन्स्ट्च्यिूटमा कोचिङ पढाउन व्यस्त हुँदा सरकारी कामकाजमा प्रत्यक्ष असर परेको  र सरकारका गोप्य सूचनाहरु पनि बाहिरिने गरेको भन्दै उजुरी परेको र उक्त उजुरीका आधारमा पत्र काटिएको अख्तियार दुरुपयोग अनुसन्धान आयोग स्रोतले जनाएको छ ।

Advertisement 1

अधिकृतदेखि उपसचिव, सचिव तहसम्मका कर्मचारीहरु नीजि इन्स्टिच्युटमा आबद्ध रहेका र कतिपय कर्मचारी बिहान,दिँउसो समेत इन्स्टिच्यूडमै पढाउने गरेको उजुरीका आधारमा उनीहरुलाई पत्र काटिएको अख्तियार स्रोतले जनाएको छ । कार्यालयको कामभन्दा लोकसेवा तयारीसम्बन्धी इन्स्टिच्युटमा धेरै समय बिताउन थालेको भन्दै अख्तियारले एकै लटमा ३० जना प्रशासकहरुविरुद्ध चिठी काटेको अख्तियार दुरुपयोग अनुसन्धान आयोग स्रोतले जनाएको छ ।

लोकसेवाका गुरुका रुपमा परिचित प्रशासकहरु,शंखमुलमा रहेको चैतन्य, पुतलीसडकको नेम, सोपान, एपेक्स , कामाद,लगायतका निजी इन्स्ट्च्यिूटमा लोकसेवा कक्षा पढाउँदै आएका छन् । कतिपय इन्स्टिच्यूटहरुले उपसचिव, सहसचिव र सचिवको फोटो समेत राखेर नै विज्ञापन गर्दे आएका छन ।

Advertisement 2

चिठी काटिएकामा उपसचिव,सहसचिवदेखि सचिव तहसम्मका कर्मचारीहरु रहेका छन् । अख्तियारको पत्रप्रति कतिपय कर्मचारीले आपत्ति जनाएका छन् ।
निजामती सेवासँगै प्रध्यापन समेत गरिरहेका कर्मचारीहरुले भने प्रशासकले लोकसेवा तयारी कक्षा पढाउन नपाउने र प्रशासकहरुले पढाउनुलाई अपराधको रुपमा लिइनुलाई गलत बुझाई हो,भन्दैछन् ।

एक जना सहसचिवले इकर्मचारी डटकमसँग भने,पढ्नु वा पढाउनु गलत काम र अपराध होइन् । कुनै हाकिमले पढायो वा पढाएन ठूलो कुरा होइन् । उसले कार्यलय समयमा पनि कुनै इन्स्टिच्यूडमा गएर पढायो भने त्यो चाहिँ वेइमानी हो । तर कार्यलय समयमा जनताकै सेवा गरेर बचे खुचेको समयमा उ इन्स्टिच्यूट धाउँछ र पढाउँछ भने त्यसलाई अपराधको रुपमा नहेरौं । कार्यलय समयभन्दा अघि वा पछि कुनै प्रशासकले अध्ययन अध्यापन गर्दछ भने त्यसलाई बन्देज होइन् । नियमन चाहिँ गर्नुपर्दछ ।
उनले निजामती सेवा ऐनमै कर्मचारीहरुले अध्ययन अनुसन्धान गर्न पाउने कुरा स्पष्ट लेखेको उल्लेख गर्दै कर्मचारीहरुलाई कम्पनी खोल्न,व्यवसाय गर्ने चाहिँ बन्देज लगाएको उल्लेख गरे ।
अर्काे एक सहसचिवले किताबसँग संगत भएका,लेख्ने,पढ्ने अथवा पढाउने कर्म गर्ने प्रशासक (अपवादलाई छाडेर )भ्रष्ट हुनै नसक्ने जिकिर गरे । प्रशासकले पढाउनु भनेको आफ्नो अनुभव शेयर गर्नु हो । उनीहरुले अरु हजारौंलाई असल मान्छे वा कर्मचारी बनाउने प्रयाश हो । उनीहरुले पढाएकाबाटै सार्वजनिक सेवामा प्रवेश गर्ने हुन् ।सरकारले दिएको तलवले तिनको घरबार चल्ने भए यो दौडधुप गरिरहनु पर्दैनथ्यो होला । किताबसँग संगत भएका प्रशासकहरु वा लेख्ने पढ्ने कर्म गर्नेहरु भ्रष्टाचार गर्ने जान्दैनन् ।