सरकारी कर्मचारीको तलब रकम बढेको छ। आर्थिक वर्ष ०७९/ ८० को बजेट वक्तव्यमार्फत अर्थमन्त्री जर्नादन शर्माले यसको घोषणा गरेका हुन्। सरकारी सेवामा रहेका राजपत्र अनंकित र राजपत्र अंकित कर्मचारीका १५ प्रतिशतले तलब बढेको हो। महंगीभत्ता र पोसाक भत्ता भने यथावत राखिएको छ।

Advertisement 1

तलब बृद्धिपछि मुख्यसचिवले ७७ हजार २११ रुपैंया बुझ्नेछन् भने सचिवले ७२ हजार ८२ रुपैंया मासिक रुपमा पाउनेछन् । यस्तै साउनदेखि सहसचिव वा सो सरहका कर्मचारीले ५६ हजार ७८७ रुपैंया पाउनेछन् । यस्तै तलबवापत उपसचिव वा सो सरहका कर्मचारीहरुले ४८ हजार ७३७ रुपैंया पाउनेछन् । यस्तै अधिकृत वा सो सरहका कर्मचारीहरुले ४३,६८९,नासु वा सो सरहका कर्मचारीले ३४७३० रुपैंया तलब वापत बुझ्नेछन् ।
यस्तै खरदारको मासिक तलब ३२ हजार ९०२ पुगेको छ भने राप अन तृतीय श्रेणीका कर्मचारीहरुले मासिक २७६१२ र राप अन चर्तुथ तहका कर्मचारीहरुले मासिक २६ हजार ८२ रुपैंया तलब वापत बुझ्नेछन् ।

बढेको तलब आगामी आवको शुरू (साउन)देखि लागू हुनेछ । अघिल्लो वर्ष तलब वृद्धि नगरेको सरकारले आर्थिक संकटका बावजुद पनि कर्मचारीको तलब बढाएको हो ।

Advertisement 2

निजामती, सेना, प्रहरी, शिक्षकलगायत सबै राष्ट्रसेवकहरूलाई उत्प्रेरित गरी सेवाभाव उच्च बनाउन साउन १ गतेदेखि लागू हुनेगरी तलबमानमा १५ प्रतिशतले वृद्धि गरिएको मन्त्री शर्माले बताउनुभयो । हाल खाईपाई आएको महंगी भत्तालाई समेत निरन्तरता दिएको उहाँको भनाइ छ । राष्ट्रसेवक कर्मचारीहरूको तलब सुविधा पुनरावलोकन गर्न र श्रमिकहरूको तलब सुविधाको अध्ययन गरी सरकारलाई सिफारिस गर्न एउटा उच्चस्तरिय तलब सुविधा आयोग गठन गरिने मन्त्री शर्माले बताउनुभयो ।

सबैभन्दा मर्कामा परेका निजी क्षेत्रका श्रमिकहरुको हकमा सरकारले आयोगको सिफारिस कुर्ने भएको छ ।