सरुवा भएको बर्ष दिन बढी भइसक्यो तर कर्मचारीहरु त्यही अड्डा छोड्न मान्दैनन् । यस्तो दृश्य खोज्न टाढा कतै गइरहन पर्दैन गृह मन्त्रालय मातहतको अध्यागमन कार्यालयतिर नजर लगाए पुग्छ ।

Advertisement 1

उपप्रधान तथा गृहमन्त्री नारायणकाजी श्रेष्ठले सेटिङ मिलाएर अध्यागमन कार्यालयमा पुगेका दर्जनौं अधिकृतहरुलाई काठमाडौं बाहिर सरुवा गरेको बताए पनि उनीहरुलाई मन्त्रालयले नै रमाना नदिइ त्यही अड्डामा रोकेर राखेको भेटिएको छ । ठीक उसैगरी गृह मन्त्रालयको कर्मचारी प्रशासन फाँटसँग सेटिङ मिलाएर दुई सुब्बाहरु बर्ष दिनदेखि अध्यागमन विभागमै टिकिरहन सफल भएको फेला परेको छ ।
ती सुव्वाद्धय हुन टंकनाथ गौतम र राजीव महत्तो दुबैको बर्ष दिन अगाडि नै सरुवा भइसकेको भए पनि अध्यागमन कार्यालय छाडेर अन्यन्त्र जानु परेको छैन । एक जनाले मन्त्रालय र अर्काे सिन्धुपाल्चोक जिल्ला प्रशासन कार्यालय दरबन्दी राखेर ढुक्कैले जागिर खाइरहेको छन्,अध्यागमनमा ।
अध्यागमनका बहादुर सुब्बाद्धय हुन टंकनाथ गौतम र राजीव महत्तो । सुब्बा टंकनाथ गौतमको सरुवा मन्त्रालयमा गरिएको भए पनि उनी त्यहाँबाट सरुवा हुन परेको छैन । उनी स्टोरको हर्ताकर्ता भएर बसिरहेका छन ।

यस्तै राजीव महत्तो पनि सरुवा भएको ठाउँमा नगइ रमाना नलिइ अध्यागमनमै बस्ने अटेरी कर्मचारीभित्र पर्दछन् । सिन्धुपाल्चोक जिल्ला प्रशासन कार्यालय दरबन्दी भएपनि कम्प्युटर अपरेट महतो करिब एक बर्ष अघि देखि अध्यागमन विभागमा काजमा कार्यरत छन् । इ कर्मचारीले कम्प्युटर अपरेट राजीव महतो बारे मन्त्रालयमा सोधपुछ गर्दा २०७८ वैशाख देखि जिल्ला प्रशासन कार्यालय सिन्धपाल्चोकमा दरबन्दी रहेका महतोको २०७८ भदौ ११ गते राष्ट्रिय विपद् जोखिम न्यूनीकरण तथा व्यवस्थापन प्राधिकरणमा काज सरुवा भएको थियो भने २०७८ चैत १४ को निर्णयानुसार पुन काजमा नै अध्यागमन विभागमा कार्यरत रहेको जानकारी प्राप्त भएको छ ।

Advertisement 2

उसो त यो त्यही विभाग हो जहाँ कम्युटर अपरेटर प्रभातकुमार मल्लिक काठमाडौं बाहिर दरबन्दी भए पनि अध्यागनमा लामो समय कार्यरत रहे । इलाका प्रशासन गोटिखेल,उच्च अदालत पाटन,अध्यागमन कार्यालय पोखरामा दरबन्दी हुँदा समेत उनी लामो समय त्रिभुवन अन्तर्राष्ट्रिय विमानस्थलस्थित अध्यागमनमै डेरा जमाएर बसेका थिए । अहिले पोखरामा दरबन्दी राखेर नख्खु कारागारमा कार्यरत छन् ।

त्यही सेटिङ मिलाएर नेपाल निजामती कर्मचारी युनियनका अध्यक्ष गोपाल पोखरेलका भाइ कुमारलाई पठाइएको थियो । उनीमाथि भ्रष्टाचार मुद्धा अदालतमा विचराधिन छ ।

यस्ता जब्बर कर्मचारीलाई न त कुनै ऐन, कानुन आकर्षित हुन्छ । न कसैले छुन वा चलाउन सक्छन् । न त कुनै परिपत्रले केही लछार्न सक्छ । यहीबाट प्रष्ट हुन्छ हाम्रो कर्मचारीतन्त्र ऐन, कानुनले कम र ‘डनतन्त्र’ले बढी चलिरहेको छ ।

केही साता अघि संघीय मामिला तथा सामान्य प्रशासन मन्त्री अमनलाल मोदीले समेत रमाना नलिने कर्मचारीलाई कारवाही गर्ने मात्र बताएनन कि कर्मचारीको सरुवा व्यवस्थापन संघीय मामिला तथा सामान्य प्रशासन मन्त्रालयले कर्मचारी प्रशासन महाशाखा हेर्ने सहसचिव हेमराज तामाङ र स्थानीय तह तथा क्षमता विकास महाशाखा प्रमुख सहसचिव बलराम रिज्याल सम्मिलित कार्यदल गठन गरेका भए पजिन हरेक मन्त्रालय,निकायमा रहेका यस्ता जब्बर कर्मचारीलाई कानुनी दायरामा ल्याएर कारवाही गर्न सकेका छैनन् ।