जिल्ला प्रशासन कार्यालय कञ्चनपुरमा विद्युतीय टोकन प्रणाली शुरु गरिएको छ। सेवाग्राहीलाई सहजरूपमा सेवा दिन बुधबारदेखि विद्युतीय टोकन प्रणाली शुरु गरिएको हो।

Advertisement 1

प्रमुख जिल्ला अधिकारी गोपालप्रसाद अर्यालका अनुसार प्रशासन कार्यालय मार्फत प्रदान हुने सेवालाई सहजरूपले प्रदान गर्नका लागि विद्युतीय टोकनको व्यवस्था गरिएको र टोकनका आधारमा सेवा दिने कार्य शुरु भएको हो। सेवाग्राहीकै चाप र समस्यालाई मध्यनजर गर्दै गृह मन्त्रालयको कार्ययोजनाअनुसार शिघ्र सेवाप्रवाह र लामो समय लाइनमा बस्नुपर्ने झन्झट हटाउने उदेश्यले टोकन प्रणाली लागु गरेको बताए। ‘हामीले विचौलिया र टोकन दुरुपयोग रोक्नका लागि पनि सिसिटिभी जडान गरेका छौँ, ‘प्रजिअ अर्यालले भने, ‘सेवाग्राही आउँछन, निर्वाद रुपमा आ–आफ्नो टोकन लिएर सेवा लिएर जान्छन्।’

यसअघि पहुँचका आधारमा सेवा लिने प्रवृतिलाई समेत टोकन प्रणालीले रोक्ने प्रजिअ अर्यालको भनाइ छ।हाललाई चार प्रकारका सेवा प्रवाहमा टोकन प्रणाली लागू भएपछि सेवाग्राही समेत हर्षित भएका छन्।

Advertisement 2

कञ्चनपुरका सहायक प्रमुख प्रमुख जिल्ला अधिकारी धर्मराज जोशीले सेवाग्राहीको चाँपलाई मध्यनजर गर्दै टोकन प्रणाली लागु गरिएको बताए। उनका अनुसार उच्च भिडभाँड हुने नागरिकता, प्रतिलिपि, राहदान र राष्ट्रिय परिचयपत्रका लागि आउने सेवाग्राहीका लागि प्रशासनले टोकन प्रणालीबाट सेवा दिन थालेको छ। नागरिकता, प्रतिलिपि, राहदान र राष्ट्रिय परिचयपत्रका सेवाग्राही लामो समय लाइनमा बस्न नपर्ने गरी टोकन प्रणाली लागू गरिएको सहायक प्रजिअ जोशीले बताए।