गृह मन्त्रालयका कर्मचारीहरुको जिम्मेवारी हेरफेर भएको छ ।

Advertisement 1

यस अघि गृह मन्त्रालयमा रहेका विवादित प्रवक्ता परिवर्तन भएका छन् । उपप्रधान तथा गृहमन्त्रीको भूमिकामा रवि लामिछाने हुँदा मन्त्रीको पक्षपोषण गर्ने गरी बहालवाला सांसद लक्ष्मी कोइरी महत्तो प्रकरणमा प्रहरी संगठनको गरिमामा आँच आउने गरी विज्ञप्ती निकालेर विवादमा तानिएका फणिन्द्रमणि पोखरेलको जिम्मेवारी खोसेर त्यहाँ हालै महालेखाबाट गृहमा प्रवेश गरेका जितेन्द्र बस्नेतलाई प्रवक्ताको जिम्मेवारी दिइएको हो ।

यस अघि पञ्जीकरण विभागको महानिर्देशक चलाइसकेका बस्नेतलाई गृहको प्रवक्ताको जिम्मेवारी दिइएको हो । यस्का अलवा उनको भागमा शान्ति सुरक्षा तथा अपराध नियन्त्रण महाशाखाको जिम्मेवारी दिइएको छ ।
फणिन्द्रमणी पोखरेल आन्तरिक व्यवस्थापन महाशाखामा लगिएको छ । आन्तरिक व्यवस्थापन महाशाखामा सवारी हेर्नेगरी उप सचिव सुरेश सुनारलाई ल्याइएको छ।

Advertisement 2

हालै अर्थबाट गृहमा भित्रिएका केदारनाथ शर्मालाई प्रशासन महाशाखाको कमाण्डर बनाइएको छ । शर्माले यस अघि काठमाडौंको प्रमुख जिल्ला अधिकारी चलाइसकेका छन् ।
ओखलढुंगाको प्रमुख जिल्ला अधिकारीबाट गृहमा तानिएका उप–सचिव दिलकुमार तामाङलाई सूचना अधिकारीको जिम्मेवारी दिइएको छ ।

यस्तै,राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट उप–सचिव कृष्णप्रसाद शर्मालाई मन्त्रालयमा तानेर निजामती कर्मचारी प्रशासन शाखा हेर्नेगरी जिम्मेवारी तोकिएको छ । निजामती कर्मचारी प्रशासन शाखामा कार्यरत अधिकृत भाष्कर दाहाललाई त्रिभुवन विमानस्थल अध्यागमन कार्यालयमा लगिएको छ ।