अन्तत डा भुपेन्द्र बस्नेतको बढुवा बदर भएको छ । लोकसेवा आयोग आफैंले रद्ध एउटा विज्ञापनमा बढुवा सिफारिस भएका बस्नेतको बढुवा विरुद्ध लोकसेवा आयोग र स्वास्थ्य मन्त्रालयमा उजुरी परेपछि बढुवा सिफारिस समितिले उनको बढुवा बदर गरेको हो ।
लोकसेवाले गत कार्तिक १५ मै रद्ध गरेको एउटा विज्ञापनमा बढुवा सिफारिस समितिले उनलाई प्रमुख कन्सल्टेण्ट ग्यास्ट्रोइन्टेरोलोजिष्ट पदमा बढुवा सिफारिस गरेको थियो ।
गत पुस २१ मा बसेको बढुवा सिफारिस समितिले वीर अस्पतालका निमित्त कार्यकारी अधिकृत डा भुपेन्द्र बस्नेत बढुवा सिफारिस गर्न भ्याएको थियो । सो बढुवाको चौतर्फी आलोचनामात्र भएन । मन्त्रालय र लोकसेवा आयोगमा उजुरी समेत परेको थियो ।

Advertisement 1

दुई महिना अघि नै लोकसेवाले रद्ध गरेको विज्ञापनमा बढुवा भएका बस्नेतको बढुवा हिजो बसेको बढुवा सिफारिस समितिले सो बढुवा बदर गरेको हो ।
स्वास्थ्य मन्त्रालयको चलानी नंम्बर ८८५ ०७८र०७९, १४ कात्तिक २०७८ को पत्रअनुसार स्वास्थ्य सेवा, मेडिसिन समूह, ग्यास्ट्रो इन्टेरोलोजी उपसमूह ११ औं तह प्रमुख कन्सल्ट्यान्ट ग्यास्ट्रो इन्टेरोलोजी पदमा माग पद संख्या १ मात्र कायम गरिदिन लेखी आएकाले १५ कात्तिक २०७८ को निर्णयअनुसार देहाय बढुवा रद्ध गरिएको व्यवहोरा सम्बन्धि जानकारीका लागि यो प्रकाशित गरिएको छ भनी यस अघिको सूचनामा उल्लेख गरिएको थियो ।

Advertisement 2

तर लोकसेवा आफैले रद्ध गरेको विज्ञापनमा टेकेर बढुवा सिफारिस समितिले गत पुस २३ मा गोरखापत्र दैनिकमा एक सूचना प्रकाशन गर्दै डा भुपेन्द्रकुमार बस्नेतलाई प्रमुख कन्सल्ट्यान्ट ग्यास्ट्रो इन्टरोलोजिष्ट पद (११ औं तह)मा बढुवा सिफारिस गरेको सूचना प्रकाशन गरेको थियो । उनी कार्यक्षमता मुल्यांकनका आधारमा बढुवा सिफारिस भएको सो सूचनामा उल्लेख गरिएको छ ।
यसरी लोकसेवा आफैंले रद्ध गरेको सूचनामा बस्नेतको बढुवा भएसँगै उनको बढुवाको विरुद्धमा उजुरी परेको थियो ।
बढुवा सिफारिस समितिमा लोकसेवा आयोगका सदस्य माधव बेल्बासे,दिनेश सिलवाल,मुख्यसचिव शंकरदास बैरागी, एक जना विज्ञ सदस्य र सदस्य सचिवका रुपमा स्वास्थ्य मन्त्रालयका सचिव डा रोशन पोखरेल रहेका थिए ।
उनीहरु सम्मेलित समितिको गत २१ पुसमा बसेको बैठकले डा भुपेन्द्र बस्नेत बढुवा सिफारिस गरेको थियो ।सो बढुवा हिजोको समितिको बैठकले बदर गरेको हो ।