नेपाल बचत तथा ऋण केन्द्रीय सहकारी संघ लि (नेफ्स्कून) को ३१औं वार्षिक साधारणसभाको उद्घाटन भूमि व्यवस्था, सहकारी तथा गरिबी निवारण मन्त्री शशी श्रेष्ठले एक समारोहका बीच प्रज्ञा भवन कमलादीमा गर्नुभएको छ ।

Advertisement 1

सभालाई सम्बोधन गर्दै प्रमुख अतिथि माननीय मन्त्री शशी श्रेष्ठले सहकारी मुल्य, मान्यता र सिद्धान्त अनुरुप देशका कृषक, कालिगड, श्रमिक, न्यून आय समूह एवं सिमान्तकृत समुदायको आर्थिक जीवनस्तर रुपान्तरणमा सहकारीको भूमिका रहनुपर्ने बताउनुभयो । उहाँले समुदायमा आधारित, सदस्य केन्द्रित, लोकतान्त्रिक, स्वायत्त र स्वशासित संगठनको रुपमा सहकारी संस्थाहरुको प्रवद्र्धनात्मक विकासको कामना गर्दै सहकारीका विद्यमान उपलब्धीहरुलाई संस्थागत गर्दै समृद्ध मुलुक निर्माणका लागि उत्पादन र उत्पादकत्व अभिवृद्धिमा जोड दिन अनुरोध गर्नुभयो ।

भूमि व्यवस्था, सहकारी तथा गरिबी निवारण मन्त्रालयका सचिव डा. दामोदर रेग्मीले सहकारीलाई अर्थतन्त्र विकासको प्रमुख एक खम्बाको रुपमा राखिएको स्पष्ट पार्दै समृद्ध नेपाल र सुखी नेपालीको परिकल्पना पुरा गर्नेमा सहकारीको भूमिका अहम रहने बताउनुभयो । उहाँले सहकारी मार्फत समुदायको चाहनालाई उजागर गरी सामाजिक जिवन तथा सामाजिक दायित्वलाई दिगो बनाउनुपर्नेमा जोड दिनुभयो ।

Advertisement 2

आयमूलक गरिबी, मानवीय गरिबी र सामाजिक बञ्चितीकरणलाई न्यूनीकरण नगर्दा सम्म गरिबीको सूचक बढ्दो रुपमा रहने भन्दै सचिव रेग्मीले सहकारी मार्फत स्वरोजगारी, स्वालम्बन र आन्तनिर्भर अर्थतन्त्र निर्माणका लागि सहकारी मार्फत पुँजी परिचानमा जोड दिन आग्रह गर्नुभयो । अब सहकारी क्षेत्रले हिजोका गलत प्रवृत्तिलाई त्यागेर सुशासित, पारदर्शि, सदस्यप्रतिको उत्तरदायित्व र कानुनी उत्तरदायित्व पालना गर्दै अगाडि बढ्न सहकारी अभियान लागि पर्नुपर्ने बताउनुभयो । सरकारले नीतिगत व्यवस्थामा भएका अप्ठ्यारा फुकाउने विषयमा विभाग र मन्त्रालय सदैव अभियानसँग सकारात्मक छलफलका लागि तयार रहेको धारणा सचिव रेग्मीले व्यक्त गर्नुभयो ।
विभागका रजिष्ट्रार रुद्र प्रसाद पण्डितले स्थिरीकरण कोषमा साकोसहरुको योगदान बढाउनुपर्ने आवश्यक औल्याउँदै कोष बलियो बने अभियान बलियो हुने विचार व्यक्त गर्नुभयो । उहाँले सहकारी अभियान केन्द्रदेखि तलसम्म शुद्धीकरण गर्नु जरुरी रहेको बताउँदै सहकारी ऐन, नियमावलीमा भएको व्यवस्था कार्यान्वयमा जोड दिन अनुरोध गर्नुभयो । विभागले स्तरीकरण कार्यक्रमको विषयमा जेष्ठ ३१ गतेदेखि हालसम्म यसका अवधारणा, अभ्यास तथा सहभागी हुने सदस्यहरुको योगदान र वैधानिकताका विषयमा अध्ययन गरिरहेको बताउनुभयो ।

कार्यक्रमको शुभारम्भमा संघका अध्यक्ष परितोष पौड्यालले बचत तथा ऋण सहकारी अभियानका अग्रजहरुको स्मरण गर्दै अग्रजहरुको परिकल्पनालाई साकार पार्न संघले अगाडि सारेका रणनीतिक मार्गचित्र प्रस्तुत गर्नुभएको थियो । उहाँले सदस्य, संस्था र अभियानलाई एकसुत्रमा बाध्नका लागि संघको विहंगम दृष्टिकोण, संस्सार, समृद्धि र समाज परिलक्षित हुनुपर्ने भन्दै त्यसतर्फ संघको पहलकदमीबारे प्रस्तुतीकरण गर्नुभएको थियो ।