महिला बालबालिका तथा जेष्ठ नागरिक मन्त्री उमा रेग्मीले मुलुकका ८० प्रतिशत निजामती कर्मचारी खराब रहेको टिप्पणी गर्नुभएको छ । निजामती क्षेत्रमा २० प्रतिशत कर्मचारी इमान्दार भए पनि उनीहरुमाथि समेत त्यही ८० प्रतिशतको थिचोमिचो हुने गरेको बताउनु भएको छ । उहाँले यो मुलुक व्युरोक्रेट र कर्मचारीतन्त्रले बिगारेको आरोप समेत लगाउनु भएको छ ।

Advertisement 1

हालैमात्र इजिष्टमा सम्पन्न कोप २७ सम्मेलन र त्यहाँबाट फर्किएपछि वन सचिव पेमनारायण कँडेल तथा मन्त्रालयका सहसचिवहरुले गरेको अपमानपूर्ण व्यवहार पछि उहाँले कर्मचारीमाथि त्यस्तो आरोप लगाउनु भएको हो ।

इकर्मचारी डटकमसँग कुराकानी गर्दै मन्त्री रेग्मीले कर्मचारीहरुमा मुलुक बनाऔं भन्ने सोच नै नभएको टिप्पणी समेत गर्नुभयो । उहाँले कर्मचारीमा कहाँ गए बढी सेवा र सुविधा पाइन्छ ? कुन मन्त्रालयमा सरुवा भएर गएको खण्डमा बढी सेवा सुविधा बढी वा कसरी बढी भन्दा बढी विदेश घुम्न कसरी पाइन्छ भन्ने ध्यानमात्र रहेको उहाँको आरोप छ । उनीहरुलाई कसरी ठूलो र पैसा कमाउने ठाउँमा सरुवा भएर जान सकिन्छ ? कसरी बढीभन्दा बढी धन आर्जन गर्न सकिन्छ भन्नेमा मात्र ध्यान केन्द्रीत भएको आफूले पाएको मन्त्री रेग्मीले सुनाउनु भयो ।

Advertisement 2

८० प्रतिशत कर्मचारीमा टिएडीए र पदोन्नति कसरी पाइन्छ भन्ने धुनमात्र केन्द्रित रहेको मन्त्री रेग्मीको आरोप छ । उहाँले कर्मचारीहरु जोखिम मोलेर कामै गर्न नचाहने गरेको आरोप समेत लगाउनुभयो । यति गरौं न भन्ने जोखिम मोलेर सही गर्दैनन् जबकी एउटा राजनीतिक नेतृत्व जोखिम मोलेर सही गर्दछ । कर्मचारीहरु जोखिम मोलेर सही गर्न समेत तयार हुँदैनन । अधिकांश कर्मचारीहरुमा राजाको काम कहिले जाला घाम भनेझैं १० देखि ५ समय कटाउन मात्र केन्द्रित रहेको मन्त्री रेग्मीले आरोप लगाउनु भएको छ ।

यद्यपि निजामती वृत्तभित्र  २० प्रतिशत राम्रो कर्मचारी रहेको र ८० प्रतिशत नराम्रा कर्मचारीकै हालिमुहाली भएका कारण राम्रा काम गर्न कर्मचारीहरु ओझेलमा परेको रेग्मीको टिप्पणी छ ।