सरकारले प्रत्येक जिल्लामा रहेका मुख्य निर्वाचन अधिकृत र प्रत्येक निर्वाचन क्षेत्रका निर्वाचन अधिकृतलाई सुरक्षार्थ व्यक्तिगत सुरक्षाकर्मी (पीएसओ) प्रदान गर्ने भएको छ । गृह मन्त्रालयले उक्त व्यवस्थाबारे सबै जिल्ला प्रशासन कार्यालय, नेपाल प्रहरी र सशस्त्र प्रहरी बललाई जानकारी गराउँदै जिल्ला निर्वाचन कार्यालय,मुख्य निर्वाचन अधिकृतको कार्यालय तथा निर्वाचन अधिकृतको कार्यालयमा जुनियर अधिकृतको कमाण्डमा ६ जनाको सुरक्षाकर्मी टोली खटाउन निर्देशन दिएको छ ।

Advertisement 1

मन्त्रालयले अस्ति लेखेको पत्रमा आगामी प्रतिनिधि सभा तथा प्रदेश सभा सदस्य निर्वाचन विशेष सुरक्षा योजना, २०७९ अनुसूची ७ को बुँदा नम्बर १.६ को (क) अनुसार जिल्लास्थित जिल्ला निर्वाचन कार्यालय,मुख्य निर्वाचन अधिकृतको कार्यालय तथा निर्वाचन अधिकृतको कार्यालय सुरक्षार्थ जुनियर अधिकृतको कमाण्डमा ६ को जनाको दरले सशस्त्र प्रहरी बल,नेपालबाट सुरक्षाकर्मी खटाउने भनिएको छ ।

त्यस्तो अवस्थामा जुनियर अधिकृत अपुग हुन गएमा सशस्त्र प्रहरी बलका वरिष्ठ हवल्दारको कमाण्डमा टोली परिचालन गर्न सकिने गरी सुरक्षा योजना स्वीकृत गरिएको जानकारी पनि गराइएको छ ।

Advertisement 2

त्यसैगरी प्रतिनिधि सभा तथा प्रदेश सभा सदस्य निर्वाचन तह निर्वाचन (जनशक्ति व्यवस्थापन) (पहिलो संशोधन) निर्देशिका, २०७९ को दफा ६ मा मुख्य निर्वाचन अधिकृत तथा निर्वाचन अधिकृतलाई व्यक्तिगत सुरक्षाकर्मी समेत खटाउने व्यवस्था भएकाले उक्त सुरक्षाकर्मीसमेत उल्लिखित कार्यालय सुरक्षार्थ खटिएका जनशक्तिबाटै व्यवस्थापन गर्न भनिएको छ ।