केही दिन अघि पर्यटन मन्त्रालयका उपसचिव प्रमोद नेपाल ६ लाख घुससहित पक्राउ परे । १७ साउनको अपरान्हतिर संस्कृति पर्यटन तथा नागरिक उड्डयन मन्त्रालयका उप–सचिव नेपाललाई अख्तियारको टोलीले ६ लाख घुस रकमसहित रंगेहात पक्राउ गरेको थियो । साथमा उनको गाडीबाट थप १६ लाख रुपैंया भेटिएको छ । यो प्रकरण सेलाउन नपाउँदै फेरि अर्का कर्मचारी घुस काण्डमा फन्दामा परेका छन् ।

Advertisement 1

पर्यटन मन्त्रालयका एक जना अधिकृत यस्तो फन्दामा परेका हुन । म्यानपावर व्यवसायीसँग गरिएको डिल प्रकरणमा उनले मागेको बीस अहिले बिष बनेको छ ती अधिकृतका लागि । उनी हुन धनञ्जय मेहता । जिम्मेवारीको हिसाबले उनी कार्यरत थिए अष्ट्रियाको राजधानी भियनास्थित नेपाली दूतावासका सेकेण्ड सेक्रेटरीको रुपमा । केही दिन अघि मात्र उनैले एक जना व्यवसायीसँग २० लाख घुस मागेको प्रकरण चर्किएपछि उनलाई त्यताबाट परराष्ट्र मन्त्रालयमा तानिएको हो ।

अबको डेढ हप्ता अर्थात् भदौ १९ गतेभित्र थप कारबाहीका निम्ति अष्ट्रिया छाड्न निर्देशन भैसकेकोले १८ गते काठमाडौं आइपुग्ने उनले म्यानपावरवालाले पैसा अफर गरी पटक पटक जिद्दी गरेको तर घुसै खाने आफ्नो मनशाय नरहेको, भन्दै भगवानको कसम खाएका छन् ।

Advertisement 2

शाखा अधिकृत धनञ्जय मेहताले क्रोएसिया, अल्बानिया र पोल्याण्डसँग नेपाल सरकारले गरेको श्रम सम्झौताबमोजिम ५ सय वटा कोटा प्रमाणीकरण निम्ति काठमाडौं बस्ने म्यानपावर व्यवसायी टंक राउतसँग मोबाइलबाट कुरा गर्दै आर्थिक लाभ मागेको अडियो श्रम मन्त्रालयमा पुगेको थियो । त्यसउपर छानबिन गर्न परराष्ट्र मन्त्रालयले सहसचिव सेवा लम्साल, उपसचिव पुष्करराज नेपाल (कानुन) र शाखा अधिकृत दधि भण्डारी (प्रशासन) को तीन समिति गठन गरेको थियो ।

समितिबाट नियत खराब भएको प्रतिवेदन पेश भए बमोजिम उनलाई फिर्ता बोलाइएको हो ।