निर्वाचन आयोगले हिजोबाट निर्वाचन आचारसंहिता लागू नहुने बताएको छ । आयोगले एक विज्ञप्ती जारी गर्दै आयोगले यसबारे जानकारी दिएको हो । निर्वाचन आयोगले गत ८ चैत २५ गतेदेखि मुलुकभर निर्वाचन आचारसंतिहा लागू गरेकोमा झण्डै ४५ दिनपछि अर्थात जेठ १० गतेदेखि लागू नरहने व्यहोरा आयोगको निर्णयअनुसार सम्बन्धित सबैको जानकारीका लागि अनुरोध गराएको छ । आयोगको परामर्शमा २०७८ माघ २४ गतेको मन्त्रिपरिषद्को बैठकले २०७९ वैशाख ३० गते एकैचरणमा देशका सबै ७५३ वटा स्थानीय तहमा निर्वाचन गर्ने निर्णय गरेको थियो । सोहीअनुसार आयोगले चैत २५ गतेदेखि आचारसंहिता जारी गरेको थियो ।
निर्वाचन आचारसंहिता लागू नहुने भएसँगै कर्मचारी सरुवाको खेतीपाती शुरु भएको छ । हिजैको क्याविनेटले चार जना सचिवहरुको हेरफेर गर्न भ्याएको छ । जसअनुसार केही अघिमात्र शहरी विकास मन्त्रालयबाट प्रधानमन्त्री तथा मन्त्रिपरिषद्को कार्यालयमा पठाइएका मणिराम गेलाललाई खानेपानी मन्त्रालयमा खटाएर त्यहाँका सचिव सुरेश आचार्यलाई प्रधानमन्त्री कार्यालयमा पुर्याइएको छ ।
यस्तै ऊर्जा, जलस्रोत तथा सिँचाइ मन्त्रालयको सचिवमा सुशील चन्द्र तिवारीले बाजी मारेका छन् । गत ४ जेठमा मन्त्रालयका सचिव देबेन्द्र कार्की उमेर हद लागेर घर गएसँगै रिक्त रहेको सचिव पदमा राष्ट्रिय सतर्कता केन्द्रमा कार्यरत तिवारीले अवसर पाएका हुन । यस्तै भौतिक पूर्वाधार तथा यातायात व्यवस्था मन्त्रालयमा गोपाल सिग्देललाई ल्याइदा नेपाल ट्रष्टका कार्यालयमा भने यातायातबाट लखेटेर रबिन्द्र श्रेष्ठलाई लगिएको छ ।निर्वाचन आचारसंहिता लागेसँगै संघीय मामिला तथा सामान्य प्रशासन मन्त्रालय सुनसान जस्तै थियो । अब आचारसंहिता हटेसँगै फेरि मन्त्रालयमा कर्मचारीको भीभाड लाग्ने र सरुवाको खेती प्रारम्भ भएको छ । आचारसंहिता हटेकै दिन सरकारले चार सचिवको जिम्मेवारी हेरफेर गरेको छ भने दश जना सहसचिवहरुको सरुवा गरेको छ । उता संघीय मामिला तथा सामान्य प्रशासन मन्त्रालयले निर्वाचन आचारसंहिता हटेकै दिन १० सहसचिवको सरुवा गरेको छ ।