सर्वाेच्च अदालतले मुख्यसचिव शंकरदास वैरागीलाई सात दिन भित्र लिखित जबाफ माग गरेको छ । मुख्य सचिव वैरागीलाई अदालतको अवहेलनामा मुद्दामा सातदिनभित्र लिखित जवाफ मागेको हो । न्यायाधीश कुमार रेग्मीको एकल इजलासमा सातदिनभित्र आफू वा कानूनबमोजिम प्रतिनिधिमार्फत लिखित जवाफ पेश गर्न सर्वाेच्चले भनेको छ ।
अदालतले २०७८ साउन १ गतेदेखि ४० माइक्रोनभन्दा पातलो प्लाष्टिकको उत्पादन, आयात, बिक्री वितरण र प्रयोगमा पूर्णरूपमा प्रतिबन्ध लगाउने व्यवस्था लागू गर्न सरकारका नाउँमा तत्काल कार्यान्वयन गर्न परमादेश जारी गरेकोमा सो परमादेश कार्यान्वयन नगरेको भन्दै अधिवक्ता पदमबहादुर श्रेष्ठले मुख्यसचिवलाई विपक्षी बनाएर दायर गरेको अदालतको अवहेलना मुद्दामा एक हप्ताभित्र लिखित जबाफ माग गरेको हो ।
२०७४ वैशाख १ गते देखि लागू हुने गरी तत्कालीन विज्ञान, प्रविधि तथा वातावरण मन्त्रालयको मिति २०७१ चैत १८ गते नेपाल राजपत्रमा प्रकाशित ४० माइक्रोन मोटाइ सम्मका प्लाष्टिक झोलाको आयात, भण्डारण, विक्री, वितरण तथा प्रयोग गर्न प्रतिबन्ध लगाएको थियो ।सो व्यवस्था कार्यन्वयन नगरिएकोभन्दै मुख्यसचिवसँग स्पष्टीकारण मागिएको हो ।
अदालतबाट भएको आदेशमा भनिएको छ, “यसमा के कसो भएको हो निवेदन मागबमोजिम अवहेलनामा सजाय किन नहुनुपर्ने हो ? सोको आधार, कारणसहित यो आदेश प्राप्त भएका मितिले बाटाका म्यादबाहेक साता दिनभित्र आफैँ वा आफ्नो कानूनबमोजिमको प्रतिनिधिमार्फत लिखित जवाफ पेस गर्नू ।”

Advertisement 1