के सचिवहरु भनेका भकुण्डो हुन ? घरी एउटाले यताबाट बजाउने,घरी अर्काेले उताबाट बजाउने । पछिल्ला समयमा कर्मचारीहरुमा सरुवाको आतंक छ । सामान्य,गृह प्रशासन,अर्थ मन्त्रालय मात्र होइन अहिले शहरी विकास मन्त्रालयमा समेत यसैगरी कर्मचारी सरुवा गरिएको छ । १०८ दिन अघि आफैंले रोजेर ल्याइएका सचिवलाई मन्त्री रामकुमारी झाक्रीले त्यहाँबाट सरुवा गरेर प्रधानमन्त्री तथा मन्त्रिपरिषद्को कार्यालयमा पठाएकी छिन् । यस अघि मन्त्री नियुक्त भएको दुई महिना नबित्दै भ्रष्ट र असक्षमको आरोप लगाउँदै शहरी विकास मन्त्रालयबाट सरुवा गरिएका सचिव अहिले पुन शहरी विकास मन्त्रालयमै तानिएको छ । साढे तीन महिना अर्थात १०८ दिन अघि आफैंले असक्षम र भ्रष्टको आरोप लगाउँदै सरुवा गरेका सचिव रमेश सिंहलाई शहरी विकास मन्त्री रामकुमारी झाक्रीले पुन मन्त्रालयमै तानेकी छिन् ।साढे तीन महिना अघि आफैंले असक्षम र भ्रष्ट ठहर गर्दै सरुवा गरेका कर्मचारीलाई मन्त्री झाक्रीले के आधारमा र किन पुन शहरीमै तानेकी होलिन ? कर्मचारीहरुले उठाउन थालेको प्रश्न हो यो ।

Advertisement 1

मन्त्री नियुक्त भएको दुई महिना नबित्दै सचिव सिंहलाई त्यहाँबाट प्रधानमन्त्री तथा मन्त्रिपरिषद्को कार्यालयमा पठाइएको थियो । त्यहाँ भवन निर्माण विभागको डिजीबाट बढुवा भएर सचिवमा उक्लिएका इ मणिराम गेलाललाई तानिएको थियो । तर साढे महिना महिना नबित्दै उनै गेलाललाई सरुवा गरेर त्यहाँ रमेश सिंहलाई ल्याइएको छ ।

सरुवा भएको तीनम महिना १८ दिनपछि सचिव सिंह प्रधानमन्त्री तथा मन्त्रिपरिषद्को कार्यालयबाट शहरी विकासमै फर्किएका छन् । उनले तेश्रो पटक शहरी विकासको सचिवको रुपमा सचिवको रुपमा नेतृत्व गरिसकेका छन् । साढे तीन महिना अघि शहरी विकास मन्त्री रामकुमारी झाक्रीसँग ठाकठुक परेर सरुवामा परेका सचिव रमेश सिंह पुन शहरी विकास मन्त्रालयमै फर्किएका हुन । सचिव सिंहलाई यस अघि मन्त्री रामकुमारी झाक्रीले गत १३ मंसिरमा प्रधानमन्त्री कार्यालयमा सरुवा गरिएको थियो । त्यतिबेला लोभी र भ्रष्टाचारी भनी फालिएका सचिव रमेश सिंह अहिले फेरि लायक ठहरिएका छन् । प्रधानमन्त्री तथा मन्त्रिपरिषद्को कार्यालयमा थान्को लगाइएका उनलाई पछिल्लो क्याबिनेट बैठकको निर्णयमा पारेर शहरीमै फर्काइएको हो । सिंहले अस्ति शुक्रवारै पदबहाली गरिसकेका छन् ।