Advertisement 1

एमाले विभाजनसँगै सबैभन्दा ठूलो कर्मचारी संगठन नेपाल निजामती कर्मचारी संगठन पनि विभाजन भएको छ ।
शनिवार एक कार्यक्रमका बीच अर्काे संगठन एकीकृत सरकारी कर्मचारी संगठन गठन गरेको छ । जस्को संयोजक तोकिएका छन् मोहनकुमार घिमिरे । घिमिरे नेपाल निजामती कर्मचारी संगठनका पूर्व अध्यक्ष हुन । कुशल संगठक मानिएका उनै घिमिरेको संयोजकत्वमा १५१ सदस्यीय अधिवेशन आयोजक समिति गठन गरेको छ । जहाँ ३५ सदस्यीय सचिवालय बनाएको छ ।
एमाले विभाजन भएसँगै ववरमहलमा रहेको निजामती कर्मचारी संगठनको भवनमा माधव नेपाल पक्षीय कर्मचारीहरुले दावा गर्दै आएका छन् । पार्टी सँगै संगठनसमेत विभाजन भएपछि सो भवन कस्को भागमा पर्ने विवाद टुंगिसकेको छैन । झलनाथ खनाल प्रधानमन्त्री हुँदा क्याविनेटबाटै पास गराएर संगठनका नाममा जग्गा ल्याएर भवन बनाउने काम भएका कारण सो भवनमा माधव नेपाल पक्षका कर्मचारीहरुले दावा गर्दै आएका छन् ।

उता लैनचैरमा अवस्थित दुग्ध विकास संस्थानदेखि उत्तरतर्फ एनसेल कार्यालयपछाडि खेलकुद परिषद्को कभर्ड हल छ । त्यही हलको पश्चिमतर्फ एउटा भवन टाँसिएको छ । त्यसमा धेरै अघिदेखि एमालेनिकट पेशागत महासंघको कार्यालय सञ्चालनमा थियो । गत भदौमा एमाले विभाजन भएपछि अहिले त्यहि एउटा भवन मात्र सम्पत्तिको नाममा समाजवादीको भागमा परेको छ ।

Advertisement 2

उक्त भवन पार्टी एकीकृत हुँदादेखि नै पेशागत महासंघको भएकाले अहिले आफूहरुको हुनुपर्ने एमालेनिकट कर्मचारी र नेताहरुले दाबी गर्दै आएका छन् तर महासंघको नेतृत्वसहित अधिकांश सदस्य नेकपा एकीकृत समाजवादीमा रहेकाले उक्त घर एमालेलाई दिन नसकिने महासंघको ठहर छ ।

महासंघले सो घर जग्गा किनेर आफैँले बनाएको हुँदा हस्तान्तरण गर्न नसकिने जवाफ दिएको छ । पेशागत महासंघमा निजामती कर्मचारी संगठन, शिक्षक संगठन, अन्तरसंस्थान, अन्तर बैंक, स्थानीय कर्मचारी संगठन, निजी सामुदायिक विद्यालय शिक्षक तथा कर्मचारी, स्वास्थ्य प्राविधिक संघलगायत आबद्ध छन् ।

२०५० सालमा सीताराम नेपालको संयोजकत्वमा महासंघ गठन भएको थियो । त्यसलगत्तै २०५१ सालको महाधिवेशनले प्राध्यापक हर्षनारायण धौभडेललाई अध्यक्ष चयन गरेको हो । अहिले पदाधिकारीहरुमध्ये दीपक सुवेदी एमालेतिर लागेको बताइन्छ ।

केही पहिलेसम्म विश्वनाथ प्याकुरेल अध्यक्ष रहेको महासंघमा अहिले प्रेमल खनालको संयोजकत्वमा अधिवेशन आयोजक समिति बनाइएको छ । विद्युत प्राधिकरणका रामप्रसाद रिमाल महासचिव र सदस्यहरुमा कानुन व्यवसायी शंकर सुवेदी, गगनसिंह बिष्टलगायत छन् ।

पार्टी विभाजन हुँदा पनि पेशागत क्षेत्रमा एमालेको प्रभाव सामान्य देखिएको बताइन्छ । विगतमा पार्टीको पेशागत जिल्ला कमिटी बैठक राख्न पटक पटक आग्रह गरिँदा वास्ता नगरिनुले एमाले कमरेडहरुको आशंकालाई उजागर गरेको महासंघका एकजना पदाधिकारीले बताए ।