सरकारले दिनपछि अवकाशमा जान लागेका एक जना सहसचिवलाई सचिव पदमा बढुवा गरेको छ । शुक्रवार अपरान्हमा सिंहदरबारमा बसेका मन्त्रिपरिषद्को बैठकले तेश्रो नम्बरमा सिफारिस भएका सहसचिव शंकर प्रसाद खरेललाई सचिव पदमा बढुवा गरेको छ। बढुवा समितिको सिफारिसमा सहसचिवत्रय रामेश्वर दंगाल, मुकुन्द निरौला र शंकरप्रसाद खरेलको नाम सिफारिस गरेको थियो। मन्त्रिपरिषद्ले वरिष्ठ सहसचिवलाई सचिवमा बढुवा नगरी कनिष्ठ सहसचिवलाई ४ दिन भए पनि सचिव बनाएर घर पठाउने उदेश्यले सचिवमा बढुवा गरेको हो । जागिरे जीवनको लामो समय लोकसेवा आयोग,योजना आयोग,आन्तरिक राजश्व विभागमा बिताएका खरेल आगामी ४ माघबाट अनिवार्य अवकाशमा जाँदैछन् । अवकाश पाउनु चार दिनअघि उनलाई सचिव बनाइएको हो ।
खरेल २०४४ साल साउन १ मा सेवा प्रवेश गरेका थिए। उनी २०६९ फागुन २६ मा सहसचिवमा पदोन्नति भएका थिए। उनै खरेलकै लागि अघिल्लो साता बसेको मन्त्रिपरिषद्को बैठकले प्रधानमन्त्री तथा मन्त्रिपरिषद्को कार्यालयमा सचिवको दरबन्दी समेत थपेको थियो ।

Advertisement 1

सचिवमा बढुवा भएका खरेल पदस्थापन समेत नभइ अवकाशमा जाँदैछन् । यस अघिको सरकारले दुई साता पछि अवकाशमा जान लागेका बीर बहादुर राईलाई सचिवमा बढुवा गरेको थियो । राई पनि पदस्थापन नै नभइ अवकाशमा गएका थिए । सचिव पदबाट अवकाश पाएका राई अहिले लोकसेवा आयोगका सदस्य छन् ।