सरकारले चालु आर्थिक बर्षको बजेटमा कर्मचारीका ल्याएको एउटा कार्यक्रम थियो निजामती कर्मचारीलाई १० दिन पर्यटन बिदा दिने । सरकारले बजेटमार्फत आन्तरिक पर्यटन प्रवर्द्धन गर्न निजामती, सार्वजनिक संस्थान र प्रतिष्ठानका कर्मचारीलाई १० दिनको पारिश्रमिक बराबर रकमसहित पर्यटन काज उपलब्ध गराउने बताएको थियो ।सो कार्यक्रम छिट्टै कार्यान्वयन गर्ने सरकारको तयारी छ । जसअनुसार,उक्त कार्यक्रम कार्यन्वयनमा लैजानका लागि पर्यटन मन्त्रालयले गत असोजमै कार्यविधि तयार गरी अर्थ मन्त्रालय पठाएको थियो। पर्यटन मन्त्रालय, अर्थ मन्त्रालय र सम्बन्धित निकायबीच बजेटका विषयमा अहिले छलफल भइरहेको छ ।

Advertisement 1

पर्यटन मन्त्रालयले पर्यटन काज निर्देशिका २०७८ तयार पारिसकेको छ ।
जसअनुसार निजामती कर्मचारीसहित एक जना सदस्यलाई १० दिनसम्म पर्यटन बिदामा जान पाउने छन् । सम्बन्धित कर्मचारी र निजका परिवारलाई प्रतिव्यक्ति दुई हजारका दरले यातायात खर्चबापतको रकम एकमुष्ट अग्रिम रूपमा समेत उपलब्ध गराउन पेस्की रकम बुझ्ने व्यवस्था छ । र कर्मचारी भ्रमणबाट फर्किएको ३५ दिनभित्र भ्रमण प्रतिवेदन बुझाउनुपर्नेछ।

कार्यविधिअनुसार पर्यटन काज कार्यान्वयनका लागि सम्बन्धित कार्यालय आफैँले वार्षिक कार्ययोजना बनाउनुपर्नेछ । पर्यटन काजमा जान इच्छुक कर्मचारीले कार्यरत कार्यालयमा निवेदन दिनुपर्नेछ। कार्यालय प्रमुखले आलोपालो गरेर घुम्न पठाउने व्यवस्था गर्नेछ। कार्यक्रमको सीमाभित्र रहेर कार्यालयले कर्मचारीलाई पर्यटन काजमा पठाउन सक्ने, सम्बन्धित कार्यालयले कर्मचारीलाई पर्यटन काजमा पठाउँदा कार्यालयको काम तथा नियमित सेवा प्रवाहमा बाधा नपर्ने गरी पठाउनुपर्नेछ ।
घुम्न जाँदा कर्मचारीले कार्यालय रहेको जिल्ला, ससुराली र स्थायी ठेगाना रहेको जिल्ला छान्न पाउने छैनन्। यस्का अलवा कर्मचारीले सरकारी सवारीसाधन लिएर जान पाइँदैन भने सरकारी आवास गृहमा पनि बस्न पाउने छैनन्।